Ipeshkvijtë e Kilit në vizitë ad limina në Vatikan. Imzot Goiq Karmeliq: duam t’i
bëjmë laikët më protagonistë në kishën tonë
(25.11.2008 RV)Ka filluar dje e do të përfundojë më 5 dhjetor vizita "ad Limina
Apostolorum - tek Varret e Apostujve" e ipeshkvijve të Kilit. Si çdo Kishë tjetër
e Amerikës latine edhe ajo e Kilit po përjeton valën ungjillëzuese të Aparesidës –
vendit të vogël brazilian ku vitin e shkuar të gjithë ipeshkvijtë e Amerikës latine
u mblodhën në kuvend. Misioni i ungjillëzimit të ri, që nisi menjëherë pas kësaj konference,
e ka bërë kishën kilene t’i kushtojë vëmendje e përkujdesje të veçanta familjes, të
rinjve dhe laikëve në përgjithësi. Këto impenjime konkrete i pohoi edhe imzot Alehandro
Goiq Karmeliq, kryetar i konferencës ipeshkvnore kilene, i cili kryeson delegacionin
e ipeshkvijve të vendit në vizitë ad limina në Vatikan:
Përgjigje: Ne
si konferencë ipeshkvnore kemi botuar së fundmi edhe udhëzimet baritore në përputhje
me konferencën e Aparesidës. Përveç familjes e të rinjve, dioqezat tona po i kushtojnë
një vëmendje të posaçme edhe laikëve, që të impenjohen më tepër në shoqërinë tonë.
E pikërisht këtë impenjim duam ta përforcojmë, së bashku me praninë e laikëve në arsim,
në botën sindikaliste e politike si edhe në shoqëri në përgjithësi.
Pyetje:
Është ndezur beteja kundër abortit dhe kërcënimeve ndaj jetës dhe familjes. Cila është
situata në Kili?
Përgjigje: Mbi temën e abortit nuk ka asnjë mundësi
që qeveria të miratojë një ligj, sepse nuk ka qenë në programin e presidentit të tashëm
të republikës. Ka, po, grupe që do të donin ta ligjëronin abortin terapeutik, por
për fat shumica në këtë vend është kundër e kemi besim se do të jetë kështu edhe në
të ardhmen. Ka në fakt, projektligje parlamentare që u kundërvihen vlerave themelore
të Ungjillit, të cilat ne si prelatë, i ndjekim me vëmendje. Vendit i bëjmë të njohur
mendimin tonë, ndërsa besimtarëve të impenjuar në politikë u kërkojmë të veprojnë
në përputhje me ndërgjegjen e tyre, si në parlament, ashtu edhe në të gjitha fushat
e jetës shoqërore. Ka shumë njerëz vullnetmirë, pastaj, që edhe pse nuk e kanë dhantinë
e besimit e pranojnë propozimin tonë për mbrojtjen e jetës.