Ansar al-islam i shkruan një ipeshkvi katolik: “Ikni nga Bagdadi, ose do ta pësoni
si në Mosul”
(19.11.2008 RV)Do të zhvillohen më 31 janar zgjedhjet administrative në Irak.
Kështu lajmëroi dje zëdhënësi qeveritar, Ali Debag. Zgjedhjet, e parashikuara fillimisht
për këtë vjeshtë, u shtynë për shkak të vështirësive në miratimin e ligjit elektoral
në parlament. Ligji u miratua më në fund më 24 shtator, por pa nenin 50 të normativës
së mëparshme, që garantonte praninë e pakicave, si ajo e krishterë e të tjera, duke
u dhënë atyre një numër të caktuar vendesh në parlament. Më 3 nëntor, një nen i ngjashëm
iu shtua sërish ligjit, por ai garanton vetëm 6 vende për pakicat ndër 440 të mundshmet.
Natyrisht, të krishterët protestojnë, pasi kështu u hiqet atyre e vetmja mundësi për
të mbrojtur vetveten. Në një gazetë arabe u botua dje edhe një mesazh tjetër kërcënues
i Al Kaidës kundër të krishterëve irakianë. Grupi ekstremist Ansar al-islam i shkruan
një ipeshkvi: “Ikni nga Bagdadi e nga provincat e tjera, ose do ta pësoni si në Mosul”.
Vetëm gjatë muajit të fundit, pikërisht në Mosul janë vrarë 22 të krishterë e rreth
2 mijë familje janë larguar nga zona. “Është paralajmërimi i fundit për kryqtarët”,
theksohet në mesazh. Gjendja në Lindjen e Mesme mbetet e nderë, edhe për shkak
të situatës së vështirë ndërmjet izraelitëve dhe palestinezëve, krijuar nga refuzimi
i Tel Avivit për hapjen e një rruge, ku të kalojnë ndihmat humanitare drejt Gazës,
aktualisht nën kontrollin e organizatës fondamentaliste Hamas. Për perspektivat e
paqes, pas zgjedhjes së presidentit të ri amerikan, Barak Obama të dëgjojmë atë David
Jeger, i Rojtarisë françeskanë të Tokës Shenjte: Sigurisht në Lindjen e Mesme
presin shumë, presin një iniciativë të fortë e të bindur për t’i mbledhur të gjitha
palët rreth tryezës së bisedimeve e për t’i çuar drejt nënshkrimit të traktateve të
paqes. Arsyeja do të parashikonte një paqe të bashkërenduar nga ana e Izraelit me
të gjithë partnerët e tij zonalë. Jo më larg se pardje, kreu i inteligjencës ushtarake
izraelite përsëriti vlerësimin se Siria është gati dhe dëshiron të ketë paqe me Izraelin.
Nëse Siria është në paqe me Izraelin, do të jetë shumë më e lehtë edhe paqja izraelito-palestineze,
sepse do të mungojë kërcënimi i mbështetjes siriane për opozitën palestineze, për
organizatat e armatosura, të cilat përndryshe do të pengonin çdo përpjekje për paqen.