Vietnam: një tjetër sulm kundër famullisë kishtare të Thai Ha.
(18.11.2008 R.V.)Ka ngjallur shumë pikëpyetje sulmi i mbrëmjes i së shtunës
së kaluar organizuar nga disa aktivistë të Partisë komuniste vietnameze kundër kapelës
së Shën Gerardit, që ndodhet në brendësi të territorit të famullisë së Thai Ha në
Hanoi. I ngjashëm me atë që u krye me 21 shtator kundër të të njëjtit objektiv, në
sulm, sipas agjencisë AsiaNjuz, merrte pjesë edhe një delegat i Komitetit të popullit
të zonës Kuang Trung, ndërsa forcat policore dhe ato të ndërhyrjes së shpejtë bënin
sehir gjatë plaçkitjes së kapelës. Kisha e vogël nuk u dëmtua, vetëm falë ndërhyrjes
së besimtarëve të Thai Ha dhe të famullive të tjera kishtare. “Eglizë d’Azi” bëri
të ditur se banorët e lagjes treguan se atë pasdite, ndërsa në Kishë kremtohej festa
e martirëve vietnamezë, të rinjtë komunistë ishin mbledhur në selitë e tyre për të
organizuar sulmin. E njëjta gjë po bëhej edhe në zyrën e të plotfuqishmit të lagjes.
Atë Mathju Vu Koi Fung, epror i kuvendit ku gjendet Kisha e vogël, i dërgoi Komitetit
të popullit të Hanoit, policisë dhe qarkut të Dong Da-së, një letër ku denoncohet
sa ndodhi. Por ajo që shqetëson besimtarët është shkaku i sulmit, i cili ndodhi mbasi
që ishte refuzuar nga ana e autoriteteve, kërkesa e Etërve Redemptoristë për rikthimin
e truallit të famullisë. Flitet për një hakmarrje, mbasi toka që i ishte dhënë
një ndërmarrjeje veshmbathjesh është shndërruar në park publik, por besimtarët kanë
frikë edhe nga sulme të mëtejshme kundër kuvendit, famullisë dhe kapelës.