365 ditë: "Akademia Papnore e Shkencave: Çmimet Nobel në Vatikan".
(15.11.2008 RV)Shrëdinger, Bohr, Plank e Zeman janë shkencëtarë të mëdhenj.
Të katërt kanë marrë çmimin Nobel për fizikën, kurorëzim i karrierës, për njerëzit
që merren me kërkime shkencore. Mund të mendohet se s’ka mbetur më asgjë që t’i
çudisë. Por s’është ashtu. 1 qershori 1937 i çudit përsëri këta shkencëtarë, që janë
ftuar të shkojnë në Romë, tek Papa. Piu XI sapo ka krijuar Akademinë Papnore të Shkencave
(papnore do të thotë që varet nga papa). Është një asamble, në të cilën marrin pjesë
shkencëtarë të fushave të ndryshme: fizikanë, matematikanë, kimistë, biologë... Pa
lindur mirë, Akademia fiton menjëherë famë botërore, sepse në të bëjnë pjesë shkencëtarët
më të famshëm të botës. Shumë prej tyre në fillim u çuditën për ftesën e Papës. Në
të vërtetë, jo të gjithë ishin të krishterë, përkundrazi. Ishin nga vende të ndryshme
e i përkisnin feve të ndryshme. E pikërisht këtë dëshironte Piu XI: detyra e Akademisë
nuk është të ushtrojë autoritetin fetar, por të kërkojë të vërtetën në të gjitha fushat
e shkencës, për ta kuptuar më mirë jetën e njerëzve. Akademia do të mblidhet herë
pas here për disa javë, për të shkëmbyer mendime mbi argumente të veçanta, siç është
për shembull krijimi i universit, origjina e njeriut, rreziqet që kërcënojnë njerëzimin
nga luftërat bërthamore... Por pse Piu XI e pasardhësit e tij interesohen kaq shumë
për shkencën? Sepse mendojnë se ajo duhet të ndriçojë besimin e ta bëjë fenë më të
fortë. Kur beson në Zotin, pa ia nënshtruar besimin arsyes, krijohet rreziku i rënies
në bestytni, në bindje të rreme.Por, sipas Papës, edhe feja duhet ta ndriçojë kërkimin
shkencor: ata, që duan ta shpjegojnë gjithçka në mënyrë shkencore, nuk mund të mos
hasin vështirësi. Ka shumë gjëra që nuk mund të kuptohen. Duhet pranuar se ka mistere
më të mëdha se ne, që i njeh vetëm Zoti. Disa shkencëtarë nuk pajtohen me këtë vizion
të krishterë. Kanë frikë se Papa dëshiron t’i përdorë kërkimet e tyre shkencore, që
të vërtetojë ekzistencën e Zotit: ç’ absurditet! Zoti nuk imponohet kurrë, Zoti hyn
në zemrën e njerëzve. Ekzistenca e Zotit është e pashqyrtueshme. Max Plank, një nga
Çmimet Nobel për fizikën, do të thoshte: “Shkenca e feja i prijnë, së bashku, betejës
kundër padijes e bestytnisë, e parulla e kësaj kryqëzate ka qenë gjithnjë e do të
vijojë të jetë: ‘Deri te Zoti!”.