365 ditë: "Andre Gjaçinto Longin: në gjurmët e Shën Françeskut të Asizit përballë
fashizmit".
(13.11.2008 RV)“Pi!”. Meshtari i ri ua ngul sytë agresorëve. Është sulmuar
nga një bandë ‘këmishash të zeza”, njerëz të ndërkryer, që mbështesin lëvizjen fashiste
të Musolinit. Për të shtënë në dorë pushtetin në Itali, fashistët përdorin metoda
frikësuese, sulmojnë kundërshtarët e terrorizojnë njerëzit, që kalojnë rrugës në punë
të vet: kështu, duke ngjallur frikë e tmerr, fitojnë terren. Një nga mizoritë, që
u pëlqen më shumë, është t’i detyrojnë njerëzit të pijnë me fund një nga pijet më
të neveritshme: vaj ricine. Meshtari, duke parë fytyrat e atyre që e rrethojnë,
e kupton se s’ka nga t’ia mbajë: duhet ta pijë gotën e vajit. Dalë-nga-dalë e vë në
buzë dhe … Në vitin 1936 Kisha italiane kalon çaste të vështira, posaçërisht në
zonat veriore, në Trevizo, dioqezë e imzot Longinit. Ky mik i madh i papës, që kur
u shugurua meshtar, në vitin 1886, përsërit pa u lodhur kurrë se të krishterët duhet
të punojnë për paqen. E natyrshme. Ai është kapuçin. Të lindur nga Urdhëri françeskan,
kapuçinët janë simbol i paqes e i të mirave, ashtu si themeluesi i tyre, Françesku
i Asizit. E ashtu si Shenjti i gëzimit të përkryer françeskan, janë njerëz të lutjes
e të bashkimit. Tani fashistët nuk duan ta dëgjojmë fjalën paqe e nuk mund t’i honepsin
njerëzit që i kundërvihen dhunës, ndërsa admirojnë përdorimin e forcës e bëjnë thirrje
për luftë! Imzot Longini nuk është frikacak, si e akuzojnë fashistët. Më pak se
dhjetë vjet më parë, gjatë Luftës së madhe, Trevizo ishte në vijën e frontit. Pavarësisht
nga bombardimet e vazhdueshme, Andreu Longin nuk kërkoi të shpëtojë kokën e vet. Vijoi
të jetojë ndërmjet gërmadhave të të pesëdhjetë kishave të qytetit, për të ndihmuar
popullsinë. E i ftoi të gjithë meshtarët të ndiqnin shembullin e tij. Gjatë shërbimit
baritor, punoi me gjithë zemër për riorganizimin e dioqezës, duke i njohur nga afër
meshtarët e famullitë, e posaçërisht duke u munduar të krijojë një unitet të fuqishëm
ndërmjet katolikëve, të cilët u përçanë rishtas politikisht nga lindja e lëvizjes
fashiste. Imzot Longin psherëtin thellë. I duhet t’i ballafaqojë përsëri meshtarët,
t’u ngjallë guximin, të luftojë për paqen, edhe në se do t’i duhet të pijë tonelata
vaj ricine e të trajtohet edhe më keq se u trajtua. Kisha duhet të jetë kështjellë
e pathyeshme i lirisë, përballë përdhunës. Ndërsa përpiqet të mbyllë sytë, pas
sulmit kaq poshtërues, ipeshkvi mërmërit fjalët e Shën Françeskut të Asizit: “O Zot,
më bëj lajmëtar të paqes sate! Ku ka urrejtje, të çoj dashurinë… Në vitin 2002
Gjon Pali II e shpall Andre Loginin të Lum.