Ամենայն Հայոց Կաթողիկոսը վերաօծեց Մադրասի Ս. Մարիամ Աստուածածին եկեղեցին

Նոյեմբերի 8-ին Գարեգին Բ Ամենայն Հայոց Կաթողիկոսը, Քերալլա նահանգին մէջ աւարտելով իր եղբայրական այցը Հնդիկ Մալանկարա Եկեղեցւոյ պետ` գերերջանիկ Մարթոմա Դիդիմոս Ա-ին, մեկնեց Մադրաս, ուր նոյեմբեր 9-ին կատարեց Ս. Աստուածածին եկեղեցւոյ վերաօծման արարողութիւնը։ Եկեղեցին, որ կը գտնուի հայկական փողոցը, կառուցուած է 1712 թուականին և վերանորոգուած Կալկաթայի հայկական համայնքի ջանքերով։

Արարողութեան ընթացքին Ամենայն Հայոց Կաթողիկոսը Հայաստանէն բերուած նորօրհնեալ սրբալոյս միւռոնով վերաօծեց եկեղեցին, Ս. Սեղանը և եկեղեցւոյ 16 սիւները։

Արարողութեան աւարտին Ամենայն Հայոց Կաթողիկոսը իր Հայրապետական պատգամը ուղղեց Մադրաս ժամանած հաւատացեալներուն։ Մեր նախնեաց կողմէն 1712 թուականին կառուցուած Ս. Մարիամ Աստուածածին եկեղեցին 300 տարի շարունակ ծառայած է մեր ազգի զաւակներուն և իրականացուցած Քրիստոսի աւետարանը և ազգային ժառանգութիւնը անոնց ուսուցանելու իր սրբազան առաքելութիւնը։ Այնուամենայնիւ, ժամանակը չի խնայեր մեր հնդկահայ համայնքին։ Համայնքը փոքրաթիւ դարձած է, և այժմ խումբ մը հայ մնացած է Հնդկաստան։ Սակայն անոնք նուիրումով և արթնութեամբ կենդանի կը պահեն և կը պաշտպանեն մեր նախնիներու հաւատքը։

300 տարի շարունակ Աստուծոյ այս տունը անսասան և ամուր մնացած է, քանզի անիկա կառուցուած է հաւատքի ժայռի վրայ։ Այդ նոյն հաւատքն է, որ վերականգնեց և վերանորոգեց այս եկեղեցին, նշեց վեհափառը` իր օրհնութիւնն ու գնահատանքը փոխանցելով Հնդկաստանի հայ եկեղեցական վարչութեան և հոգևոր հովիւ Օշական վարդապետին՝ անոնց հաւատարիմ և նուիրեալ աշխատանքին համար, որու շնորհիւ Մադրասի եկեղեցին վերանորոգուեցաւ և բարեզարդարուեցաւ՝ կրկին դառնալով կենդանի աղօթատեղի։

Գարեգին Բ. նշեց նաև, որ Մադրասի եկեղեցիին մէջ թաղուած հայորդիներու հոգիները ցնծութիւն կ`ապրին և կ`օրհնեն մեզ՝ աղօթելով, որպէսզի մենք ալ իրենց նման հաւատարիմ մնանք մեր Տէր Յիսուս Քրիստոսին, որպէսզի Մաշտոցի լեզուն և Նարեկացու ոգին մշտապէս ներկայ ըլլան Ս. Մարիամ Աստուածածին Եկեղեցւոյ կամարներու ներքեւ՝` դիմակայելով ժամանակի ընթացքին և մշտապէս գոհութիւն մատուցանելով Բարձրեալ մեր Տիրոջը։

Յատնենք`որ Ս. Աստուածածին եկեղեցին Ծայրագոյն Արևելքի ամենահին հայական եկեղեցիներէն մեկն է։