Ծիսական ժամանակացոյց հինգշաբթի նոյեմբեր 6, Ը. շաբաթ զկնի Խաչի, տօնն է Մետրոփանոս եւ
Աղեքսանդրիոս հայրապետներու եւ Մարկիանոս ու Մարտիրոն նօտարներու։
Մետրոփանոս հայրապետը եղաւ Կ.Պոլսոյ առաջին պատմական եպիսկոպոսը, գահակալած՝
306-325։ Իր օրով նախկին Բիւզանդիոնը վերածուեցաւ կայսերական մայրաքաղաք։ Խոր ծերութեան
պատճառաւ չմասնակցեցաւ Նիկիոյ ժողովին, այլ ղրկեց իր աւագերէցը` Աղեքսանդրոս, որ իր յաջորդը
եղաւ։ Վախճանեցաւ խաղաղ մահով։
իսկ Աղեքսանդրիոս հայրապետը յաջորդեց Մետրոփանոս
հայրապետին։ Եպիսկոպոս օծուեցաւ Նիկիոյ ժողովի հայրերէն։ Ան եղաւ Առատաձեռն, պերճախօս,
արդար եւ աստուածասէր հովուապետ մը ։ Իր եւ Ս. Յակոբ Մեծբնացիի աղօթքին կը վերագրուի
Արիոս հերետիկոսի յանկարծական եւ չարաչար մահը։ Աղեքսանդրոս հայրապետը վախճանած է խաղաղ
մահով 340-ին։