Kontributi i shkencave psikologjike në vlerësimin e kandidatëve për meshtari. Orientimet
e Vatikanit
(31.10.2008 RV)Kongregata për Edukimin
Katolik paraqiti “Orientimet” mbi kontributin e mundshëm të shkencave psikologjike
në vlerësimin e një kandidati për meshtari. Organizmi i Vatikanit përsëriti “jo”-në
e tij për shugurimin e personave me prirje homoseksuale. Psikologjia mund të jetë
e dobishme në një epokë, ku mbizotërojnë forma të ndryshme relativizmi moral dhe kulturor,
me kusht që kontributi i saj të mbetet gjithnjë pjesa më pak e rëndësishme e rrugës
formuese të një seminaristi. Gjithashtu, eksperti duhet të jetë besimtar, apo, siç
thuhet në dokument, “ta ndërthurë shkencën psikologjike me këndvështrimin e fesë”.
Kush troket në portën e seminarit për t’u bërë meshtar sjell pa dyshim me vete,
përveç filizave të thirrjes, edhe “plagët” pak a shumë të thella të kohës sonë. Kardinali
prefekt i dikasterit të Edukimit Katolik, Zenon Groçolevski, i rreshtoi këto plagë
në fillim të fjalës së tij, gjatë konferencës së djeshme të shtypit në Vatikan. Konsumizmi,
paqëndrueshmëria e marrëdhënieve familjare dhe shoqërore, relativizmi moral, pikëpamjet
e gabuara mbi seksualitetin, mundësitë e pakta për të zgjedhur rrugën e jetës, mohimi
sistematik i vlerave janë të gjitha forma, që ndikojnë në mentalitetin e të riut,
i cili dëshiron të bëhet meshtar, duke shkaktuar probleme të karakterit, ose pasiguri
për thirrjen. Për gjykimin e kandidatit mbetet në fuqi rruga e zakonshme, e ndjekur
deri tani, nga ipeshkvi tek ati shpirtëror, të cilët kanë parasysh se thirrja është
dhuratë e veçantë e Zotit. Në këtë kuadër, shkencat psikologjike mund ta ndihmojnë
Kishën, për vlerësimin e kandidatëve, vetëm në raste apo problematika të veçanta: “Nuk
duhet të jetë një praktikë e detyrueshme as e zakonshme në pranimin apo në formimin
e kandidatëve për meshtarë. Në këtë kuptim, roli i psikologut është integrues, jo
zëvendësues, si në dallimin fillestar, ashtu edhe në formimin e mëtejshëm”. Hapat
e para për hartimin e dokumentit vatikanas janë bërë në vitin 1995, por ai pasqyron
mendimin e Kishës, të pjekur që në vitet ’70. Përmes pyetjeve të gazetarëve, u fol
edhe për një problem tepër delikat: atë të qëndrimit ndaj një kandidati me prirje
homoseksuale. Ja përgjigjia e kardinal Groçolevskit: “Nëse kjo prirje ka lëshuar
rrënjë, kandidati nuk mund të pranohet në ushtrimin e meshtarisë, pikërisht për natyrën
e kësaj të fundit. Prandaj, kjo është një plagë që ndikon pikërisht në ushtrimin e
meshtarisë, në marrëdhëniet me të tjerët, e nuk ka të bëjë thjesht me aftësinë për
të mos pasur raporte homseksuale”.