365 ditë: "Tekla Merlo, predikatarja e Ungjillit me mjetet moderne të komunikimit".
(22.10.2008 RV)Tereza nuk kalon
pa u vërejtur. Është shtatlartë. Hollake. E shkathët. E ka dy sy të thellë, të zinj.
Këtë ditë – e është data 27 qershor 1915 – ecën mendueshëm e ngutshëm, përkrah nënë
Vinçencës. Nga Kastiljone, deri në Alba, nuk është shëtitje që bëhet lehtë e, sidomos,
kur ecën në këmbë. Më në fund arrijnë në cakun e dëshiruar: në Kishën famullitare
të Shenjtorëve Kozma e Damiani. “Rri e më prit këtu, Terezë. E lutu! Unë po shkoj
të flas me zotin Teolog”. Pas pak minutash e ëma rikthehet. Duket e trazuar.
“Shko”, i thotë, “Teologu dëshiron të bisedojë me ty”. Me çap të lehtë, Tereza
zhduket pas një porte. E ëma e pret, e pushtuar nga shqetësimi, që bëhet ankth. Por
më në fund vajza kthehet: me të njëjtin çap të lehtë, të njëjtën sjellje dinjitoze,
por këtë herë, me një dritë të re në sy, me një buzëqeshje rrezatuese në buzët e
njoma. Nënë Vinçenca nuk mund të kënaqet më vetëm me buzagazin e së bijës. Dëshiron
të dijë më shumë e prandaj nis ta pyesë pa e zgjatur “Hë, ç’të tha Teologu?”. “Më
ftoi të bashkëpunoj në veprën e tij. Tha se gruan nuk e pengon asgjë t’i kushtohet
apostullimit”. “ E ti, ç’hyn ti këtu? Ç’mund të bësh ti?”. “Asgjë, vetëm të
bëj ç’të më thotë ai”. Ai, “Teologu”, është i riu Xhakomo Alberioni, atë shpirtëror
i Seminarit të Albës, fshat në Langet kuneze, e drejtor dioqezan i gazetës së Albës.
Sapo ka nisur një veprimtari të jashtëzakonshme, që synon ta kumtojë Ungjillin me
një ‘shtyp të mirë’ e me të gjitha mjetet e reja komunikimit, që do të sigurojë progresi
në këtë fushë. Tereza, që më pas u bë Motër Tekla - do të ishte bashkëthemeluese
e Bijave të Shën Palit, një nga Institutet e Familjes Paoline, që lindën nga frymëzimi
i don Alberionit. Me dijen që vjen nga lart, ajo nisi të drejtojë, pa pikën e ngurrimit
e të frikës, mjetet e komunikimit modern. Vijoi pastaj veprimtarinë, duke u marrë
me formimin e rregulltareve të reja, që iu besuan: i bëri shkrimtare, redaktore, specialiste
bibliotekash, drejtuese librarish. E i dërgoi si ‘postiere’ të Zotit nëpër botë. Kur
vdiq - më 5 shkurt 1964 - paolinet kishin arritur në 24 kombe të ndryshme të botës,
në të pesë kontinentet.