Comece mbështet propozimin evropian për të rritur lejen e shtatzanisë në 18 muaj
(13.10.2008 RV)Që nga 3 nëntori,
Komisioni Ipeshkvnor i Bashkësive Evropiane (COMECE) do të ketë një seli të re në
Bruksel, e cila do të përurohet gjatë asamblesë plenare të vjeshtës. Fillimisht i
quajtur Shërbimi i informacionit baritor evropian katolik, COMECE është themeluar
në Bruksel, më 3 mars 1980, si mjet lidhjeje ndërmjet Konferencave ipeshkvnore dhe
Bashkimit Evropian. Përbëhet nga 24 ipeshkvij të po aq konferencave ipeshkvnore evropiane.
Ipeshkvijtë e Kroacisë dhe të Zvicrës marrin pjesë si vëzhgues. Qëllimi i Komisionit
është të shoqërojë e të analizojë procesin politik të Bashkimit Evropian, të informojë
kishat mbi zhvillimin e legjislacionit dhe të politikave evropiane, të inkurajojë
reflektimet mbi sfidat që përballon Evropa. Që nga viti 2006, COMECE ka në krye imzot
Adrianus Herman van Luyn, ipeshkëv i Roterdamit. Sekretar i përgjithshëm është atë
Piotr Mazurkieviç, meshtar në kryedioqezën e Varshavës, specialist i çështjeve evropiane
dhe drejtor i Institutit të politologjisë në Universitetin polak “Kardinal Stefan
Vishinski”. Sekretari i COMECE-s ka shprehur vlerësimin e tij për propozimin
e Komisionit Evropian që ta zgjasë largimin nga puna për arësye shtatzanie në të gjitha
vendet e Bashkimit Evropian, nga 14 në 18 muaj. “Kjo masë – lexohet në një notë –
mund t’u lejojë grave të plotësojnë më mirë impenjimet e tyre në punë e në jetën familjare,
duke garantuar njëkohësisht barazi më të madhe rrogash ndërmjet burrit e gruas”. Gjithashtu,
kjo mund të kontribuojë në rritjen e dëshirës për të bërë fëmijë. Ky propozim është
paraqitur sëbashku me një paketë për familjen, më 3 tetor. COMECE sheh si një hap
tjetër përpara që mund të bëhet, kërkesën që në momentin e kthimit në punë, gratë
të mund të pretendojnë nga punëdhënësit një orar të ndryshueshëm në bazë të nevojave
të fëmijës. Sekretari i përgjithshëm nxit 27 vendet evropiane të respektojnë objektivat
e Barcelonës për të realizuar deri në vitin 2010 struktura për të paktën 90% të fëmijëve
në moshën nga 3 deri në 6 vjeç, e për të paktën 33% të atyre nën 3 vjeç. Pajtimi i
punës me jetën familjare, nënvizon COMECE, duhet të jetë një nga shtyllat kryesore
të politikës shoqërore evropiane, që duhet mbajtur parasysh edhe në hartimin e ligjeve
të tjera, si ai mbi kohën e punës.