"Dhuna kundër të krishterëve" në qendër të editorialit të atë Federiko Lombardit,
zëdhënës i Vatikanit
(12.10.2008 RV)Jetojmë në një kohë
kur pakicat e krishtera, sidomos në Azi e në Lindjen e Mesme, po përjetojnë persekutimin
e kohës së katakombeve. Lajmet e fundit flasin për atentate kundër të krishterëve
në Irak, për vazhdimin e sulmeve në Indi e dhunimin e të drejtave të katolikëve në
Vietnam. Për këto të fundit, organizata Amnesty International ka kërkuar ndërhyrjen
e OKB-së. Pikërisht kësaj situate ia kushton reflektimin e tij javor, drejtori ynë
i përgjithshëm, atë Federiko Lombardi. Ta dëgjojmë: “Dhjetra vetë të vrarë,
dhjetra mijëra të shtrënguar të ikin nga shtëpitë para kërcënimeve e sulmeve. Ky është
bilanci i përkohshëm i valës së dhunës, që prej disa muajsh tashmë godet të krishterët
në Indi, jo vetëm në Shtetin e Orisës, por edhe gjetiu. Ipeshkvijtë indianë e kanë
ngritur zërin disa herë, e edhe nga jashtë, për shembull nga Bashkimi Evropian, u
janë bërë autoriteve indiane pyetje shqetësuese. Duket se më në fund – megjithëse
me shumë vonesë – fillojnë të vijnë përgjigje e siguri për impenjimin, që duhet të
sjellë qetësinë. Edhe vetë kryeministri pranoi se për Indinë kjo gjendje është “turp
kombëtar”, në kundërshtim të hapur me vlerat e mëdha të mospërdorimit të dhunës, të
tolerancës e të respektimit të feve, që ky vend i madh ka kultivuar për shekuj. Kanonizimi
në Romë i Shenjtores së parë indiane, më 12 tetor, është një rast i mirë që Kisha
universale ta përjetojë këtë periudhë të vështirë për të krishterët e Indisë, në bashkim
lutjeje e solidariteti shpirtëror. Por sigurisht duhet të kemi parasysh
se fondamentalizmat janë të gjalla e kërcënuese në shumë pjesë të botës. Dialogu ndërmjet
feve, rrugë e gjatë dhe e vështirë, është një nga sfidat më të mëdha të së sotmes
e të së nesërmes, që në emër të Zotit të ndërtohet gjithnjë e vetëm paqja”.