Sot në Sinodin e ipeshkvijve, në plan të parë, Fjala e Zotit në familje e në trojet
ku ungjillëzimi është i vështirë. Me ne, Patriku Gregori III e Maria Voçe, kryetare
e Fokolarëve.
(10.10.2008 RV)Ditë e ngarkuar
me reflektime, e sotmja në Sinodin e Ipeshkvijve, mbledhur në Asamblenë XII të përgjithshme
të zakonshme, kushtuar Fjalës së Zotit. Sot paradite, tema e familjes dhe zonat, ku
ungjillëzimi është tepër i vështirë, si Toka Shenjte, Evropa lindore ose Birmania,
ishin në qendër të diskutimeve në sallë. Në pushimin ndërmjet seancave, Benedikti
XVI priti në audiencë anëtarët e Federatës Biblike Gjermane. Ashtu si ndodhi të
martën e kaluar me Shoqatat e Bashkuara Biblike, edhe anëtarët e Federatës Biblike
Gjermane i dhuruan Papës disa variante të Besëlidhjes së Vjetër e të Re në gjuhë të
ndryshme. E ashtu si më parë, Ati i Shenjtë ua dhuroi nga një kopje të gjithë pjesëmarrësve
në Sinod.
Gjatë punimeve të sotme u prekën tema nga më të ndryshmet. E para
ishte ajo e përdorimit dhe e inkulturimit të Biblës në familje. U bënë disa propozime,
si: t’u dhurohet Bibla të gjitha familjeve, në mënyrë që secili të ketë një kopje
personale; të përfshihet edhe mësimi i Shkrimit Shenjt në shkolla; të lexohet nga
një fragment i Fjalës së Zotit çdo mbrëmje, duke e medituar në gjirin e familjes.
E akoma, t’i shtohet zyrtarisht çdo misteri të Rruzares edhe një citim i shkurtër
biblik. Sinodi i ipeshkvijve uroi që këto propozime të bëhen objekt reflektimi për
Kishën Universale. Temë tjetër, që u trajtua në Sallë, ishte edhe ajo e ungjillëzimit
në kontekste, si ai i Evropës lindore, i Birmanisë ose i Tokës Shenjte, zona gjeografike
të cilat, në të kaluarën e afërt, provuan persekutime të egra nga regjime totalitare,
katastrofa natyrore, si cikloni Nargis e konflikti izraelito-palestinez. Posaçërisht
u vërejt se të krishterët arabë hasin vështirësi në leximin e Besëlidhjes së Vjetër,
për shkak të interpretimeve politike e ideologjike që i bëhen tekstit. Në këtë drejtim,
është për t’u përmendur mendimi i Gregorit III Laham, Patrik i Antiokisë së Greko-Melkitëve,
që propozoi të organizohet një forum kushtuar Fjalës së Zotit, në të cilin të krishterët
e myslimanët të mund të takohen, të diskutojnë e të meditojnë së bashku. Ja si u
shpreh PatrikuGregori III në mikrofonin tonë:
Përgjigje:
- Dëshiroj që të krishterët e myslimanët të takohen. E ky është realitet
në Jeruzalem ku, në Qendrën e Zojës së Bekuar, të krishterët, myslimanët e hebrenjtë
takohen, pavarësisht nga situata e vështirë në Tokën Shenjte, dhe e meditojnë së bashku
Fjalën e Zotit, pa diskutime: unë meditoj e lutem, pastaj vjen hebreu e pastaj myslimani.
Kjo është pak a shumë ideja që dëshiroj ta realizoj edhe në Siri e në Liban, në zonat
e juridiksionit tim.
Pyetje: - Një ekzegjezë korrekte e Fjalës
së Zotit, sipas jush, është një pikë e përbashkët dialogu?
Përgjigje:
- Kur Zoti flet, flet për të gjithë njerëzit e, prej këndej, është edhe
një pikë e përbashkët dialogu.
Ndërsa dje pasdite,
në qendër të vëmendjes ishte tema e ekzegjezës biblike: posaçërisht u fol për nevojën
e afrimit të besimtarëve më të largët tek Fjala e Zotit, duke e përkthyer Biblën edhe
në gjuhë pak të përhapura, ose më mirë të themi, në atë gjuhë që besimtarët e marrin
vesh më mirë. Për ta realizuar këtë, më 14 tetorin e ardhshëm, do të nënshkruhet marrëveshja
ndërmjet Federatës Biblike Katolike e Shoqatave Biblike, për përkthimin e Librit Shenjt
në sa më shumë gjuhë e variante. Së fundi, u pritën me duatrokitje, fjalimet e
delegatëve vëllazëror: fjalimi i të nderuarit Gunnar Shtëlset, ipeshkëv nderi i Osos,
anëtar i Federatës Botërore Luterane dhe i të nderuarit Robert Velsh, i Dishepujve
të Krishtit. Në qendër të fjalimeve të tyre ishte dënimi i fondamentalizmit fetar,
ftesa drejtuar të gjithë njerëzve që besojnë, për t’u impenjuar në realizimin e objektivave
të mijëvjeçarit dhe thirrja për t’i kapërcyer përçarjet brenda Korpit të vetëm të
Krishtit.
Në sinodin e ipeshkvijve marrin pjesë edhe përfaqësues të lëvizjeve
laikale. Ndërmjet tyre, si dëgjuese, është edhe kryetarja e Lëvizjes së Fokolarëve,
Maria Voçe, e cila na tregon si e jetojnë Fokolarët fjalën e Zotit në jetën
e tyre të përditshme:
Përgjigje: - Ne kemi si praktikë të
posaçme të zgjedhin një herë në muaj një frazë të Shkrimit Shenjt e të impenjohemi
së bashku për ta vënë në jetë, duke transmetuar edhe përvojën vetjake. Për shembull,
në këtë çast, po jetojmë porosinë biblike: ‘Jepni, e do t’ju jepet!”. Ne besojmë me
të vërtetë se kjo nuk është porosi e dhënë dymijë vjet më parë, por fjalë që thuhet
sot, që duhet ta jetojmë sot: e ky është impenjimi i gjithë Lëvizjes.