50 vjet më parë vdiste “Bariu Engjëllor” Piu XII, Papa i njerëzimit të vuajtur.
(09.10.2008 RV)Më 9 tetor 1958
Piu XII kthehej në shtëpinë e Atit. Në Papninë e tij, që zgjati 19 vjet, Papës Eugjenio
Paçeli iu desh të përballonte tragjedinë e Luftës II Botërore dhe t’i printe Kishës
në kohë të vështira, duke vënë në jetë reforma që kanë vlerë edhe për kohët tona.
Mbrojtës i së vërtetës, intelektual modern, bari i kujdesshëm, Piu XII, besnik ndaj
motos së tij “Non nova sed nòviter”, qe përtëritës i traditës.
Papa i njerëzimit
të vuajtur, kumtar i vendosur i së vërtetës, Piu XII, e drejtoi barkën e Shën Pjetrit
në kohë dramatike për njerëzimin. Papnia e tij e gjatë nisi më 2 mars 1939, kur në
Evropë endej fantazma e luftës. Diplomat i hollë, Papa Paçeli u bëri thirrje prijësve
të kombeve, që dhuna të mos e kishte fjalën e fundit. Më 24 gusht i drejtoi fjalën
e tij autoritare mbarë botës, me një radiomesazh i cili, duke filluar që nga titulli,
“Një orë e vështirë”, nënvizon ankthin e Papës:
“Asgjë nuk humbet me
paqen. Gjithçka mund të humbasë me luftën. Njerëzit duhet të rimendojnë, t’i rifillojnë
bisedimet. Duke biseduar me vullnet të mirë e me respekt për të drejtat reciproke,
do ta kuptojnë se dialogu energjik e i sinqertë nuk e pengon kurrë arritjen e suksesit
të ndershëm”.
Thirrja, për fat të keq nuk u dëgjua! Por Papa
vijoi, e gjatë gjithë Luftës II Botërore përmes Radio Vatikanit, ngriti zërin në mbrojtje
të paqes. Zë që u dëgjua në të gjithë botën. Impenjimi i Papës nuk mbeti vetëm tek
fjalët. “Bariu Engjëllor’ themeloi një shërbim për kërkimin e robërve të luftës, hapi
dyert e kuvendeve të Romës, për të strehuar hebrenjtë, që ishin në rrezik të internoheshin
në kampet e shfarosjes. E kur, më në fund, armët heshtën, nisi ndihma konkrete të
të gjitha natyrave në vendet e ndryshme evropiane, të kthyera në gërmadhë nga lufta.
Por për fat të keq fundi i Luftës Botërore nuk i solli njerëzimit epokën e paqes,
aq të dëshiruar. Përkundrazi, hapi një epokë të tmerrshme. Papa Piu XII e kuptoi menjëherë
dhe e nënvizoi duke folur para Kolegjit Kishtar, më 24 dhjetor 1946, pikërisht atëherë
kur në Shqipëri niste shfarosja e njerëzve të fesë, klerikë e laikë:
“Në
vend që të ecet drejt paqëtimit real, në troje të hapta të globit tokësor e në zona
të ndryshme, posaçërisht të Evropës, popujt ndodhen në një situatë gjithnjë më trazuar
nga e cila, heret a vonë, mund të ndizet flaka e konflikteve të reja”.
Më
parë nazizmi, më pas komunizmi i pa Zot. Piu XII u kundërvihet drejtpërdrejtë e me
guxim të pashoq sistemeve totalitare të cilat, siç kishte theksuar në Enciklikën e
tij të parë “Summi Pontificatus’, janë rrugë që të çojnë në mënyrë të pashmangshme
larg Zotit. Sistemi sovjetik i vë në provë të rëndë besimtarët dhe barinjtë në të
gjitha vendet satelite të Moskës. Papa vuan bashkë me ata që, nga Rusia – në Shqipëri,
martirizohen në emër të Krishtit dhe, ‘në emër të doktrinës së krishterë’ e dënon
komunizmin deri në atë pikë, sa të dekretojë, më 1946, shkishërimin e të gjithë atyre,
që mbështesin partitë komuniste. Më 1954 pohon se paqja është dëshira e tij më e zjarrtë.
Fjalë që kumbojnë ende, përmes thirrjeve të tij të fuqishme:
“Nuk duam
të kritikojmë, por të nxisim. S’duam të akuzojmë, por të ndihmojmë. Kemi në zemër
ndjete paqeje e jo vuajtjeje e duam t’i zgjojmë edhe në zemrat e atyre që na dëgjojnë”.
(Radiomesazh , 24 dhjetor 1946). Mbrojtës
i doktrinës së shëndoshë, Piu XII ia hapi dyert mendimit modern, posaçërisht arritjeve
të reja shkencore dhe komunikimit shoqëror. E dëshmon këtë transmetimi i 200 radiomesazheve
të tij, në gjuhë të ndryshme, që u ndoqën nga mbarë bota. Papa Paçeli i dha një nxitje
të re misioneve në Afrikë e në Kinë, gjallëroi studimet biblike, reformoi liturgjinë,
ndërkombëtarizoi Kurien, promovoi gërmimet arkelogjike në Varrin e Shën Pjetrit. Me
të nis të marrë formë teologjia e laikatit. Përballë plagës së mjerimit në botë, Piu
XII kërkon një shpërndarje më të drejtë të pasurive, dënon shfrenimet e kapitalizmit,
mbështet me forcë kërkesat e klasës punëtore:
“Këto kërkesa përfshijnë,
përveç një page të drejtë e të mjaftueshme për përballimin e nevojave të familjes,
edhe ruajtjen e përsosjen e një rendi shoqëror, që krijon mundësitë e sigurimit të
një prone modeste, por të sigurtë, private për të gjitha shtresat e popullsisë e favorizon
shkollimin e lartë për fëmijët e klasës punëtore, që janë të pajisur me zgjuarësi
e vullnet të mirë për të mësuar”. (Radiomesazh Krishtlindje 1942).
Tepër
i devoçëm i Zojës, në Vitin Shenjt 1950 shpalli dogmën e Të Ngjiturit të Zojës së
Bekuar në qiell. Me 41 enciklikat e tij, Piu XII i la Kishës një pasuri urtie të pallogaritshme,
që ndikoi shumë edhe mbi mendimin e Etërve të Koncilit II të Vatikanit. Njeri tepër
i përmbajtur, nuk fliste kurrë për përshpirtërinë e tij, por i prekte të gjithë me
përmasën asketike. Hante pak, për të qenë solidar me të varfërit. E kur mijëra refugjatë
lufte u strehuan në Vatikan, kërkoi të mos ia ngrohnin më apartamentin, sepse deshi
të jetojë si mysafirët që ishin mbledhur nën të njëjtën strehë.