Kryerabini i Haifës: ripohoj, në sinod, dëshirën e hebrenjve për të bashkëpunuar për
paqen.
(07.10.2008 RV)Dje pasdite, para
Etërve sinodalë, foli për herë të parë, një kryerabin hebre. Ishte Kryerabini i Haifës,
Kohen, i pranishëm në Sinod si i dërguar i posaçëm. Në qendër të fjalimit të tij,
siç shprehet edhe në mikrofonin e Radio Vatikanit, ishte interpretimi i Shkrimit Shenjt
në gjirin e popullit hebraik:
Përgjigje: - I’m here not as individual... Nuk
jam këtu për të përfaqësuar veten, por Rabinatin e Madh të Izraelit, që i prin fesë
hebraike në Izrael e, në një farë mënyre, botën hebraike. Ka disa, që mendojnë se
është fjala për diçka më shumë se dialogu e dyshojnë se mund të jetë një përpjekje
për t’i sheshuar ndryshimet, gati-gati si të ishte fjala për një fe të vetme: por
nuk është kështu, sepse ka disa parime feje, në të cilat besojmë ne e besojnë të krishterët,
të cilat nuk mund t’i injorojmë. Prandaj këtu nuk është fjala për të ndryshuar, por
për t’u kuptuar njëri me tjetrin e për të jetuar sipas parimeve dhe ideve, që na bashkojnë.
Jemi bij të së njëjtës nënë, ose të të njëjtit atë, Abrahamit, - në hebraisht Avram
Avinu, Atë i tre besimeve abramitike: hebraizmit, krishterimit e islamit. Besoj se
ka shumë rëndësi ta kujtojmë zanafillën tonë: në këtë mënyrë do të jemi në gjendje
t’i sigurojmë botës paqen. Unë besoj se feja ka shumë ndikim mbi krerët laikë të të
gjitha shteteve të botës: ata duhet ta dinë mirë se të gjithë njerëzit i luten një
Zoti të vetëm!