Papa në Kuirinale: Kisha dëshiron të punojë për të mirën e përgjithshme.
(04.10.2008 RV)“Kisha do të vijojë të punojë për të mirën e përgjithshme të
Italisë, por pret edhe respekt për veprimtarinë e saj baritore, pa kërkuar privilegje
e pa cënuar lirinë e askujt”. Me këto mendime e përfundoi Benedikti XVI fjalimin,
mbajtur sot paradite në Kuirinale, gjatë vizitës që i bëri presidentit të Republikës
Italiane, Gjorgjo Napolitano. Papa ripohoi rëndësinë e bashkëpunimit ndërmjet Selisë
së Shenjtë e Shtetit italian, në frymën e njohjes së sovranitetit reciprok. Duke
shfrytëzuar rastin e festës së sotme të Shën Françeskut, Benedikti XVI vërejti se
në këtë figurë, e cila tërheq fuqimisht njerëz që besojnë e që nuk besojnë, mund të
shikojmë vetë misionin e Kishës, në lidhje të ngushtë me shoqërinë civile. Kisha,
në epokën e sotme, me ndryshimet e saj të thella e shpesh edhe të dhimshme – tha
Ati i Shenjtë – vijon t’u propozojë të gjithëve mesazhin e shëlbimit të Ungjillit
dhe impenjohet në ndërtimin e një shoqërie të bazuar mbi vërtetësinë e lirinë, mbi
respektin për jetën e për dinjitetin e njeriut, mbi drejtësinë e soldiaritetin shoqëror.