Imzot Gjovani Bulaitis dekorohet me Urdhërin “Nënë Tereza”.
(04.10.2009Presidenti i Republikës së Shqipërisë, zoti Bamir Topi, dekoron
Imzot Giovani Bulaitis, ish-Nunc Apostolik në Shqipëri, me Urdhërin ‘Nënë Tereza’,
me motivacion:
“Për kontributin shumë të rëndësishëm në zgjërimin dhe
konsolidimin e marrëdhënieve ndërmjet Shqipërisë e Selisë së Shenjtë”. Dekreti,
që mban datën 19. 05. 2008, iu dorëzua sot Imzot Bulaitis, në selinë e tij romake,
nga ambasadori i Republikës së Shqipërisë pranë Selisë së Shenjtë, zoti Rrok Logu.
Diplomati shqiptar, duke folur në emër të Presidencës, e falënderoi Prelatin për kontributin
e tij të çmuar dhjetëvjeçar në thellimin e marrëdhënieve ndërmjet Republikës së Shqipërisë
e Selisë Apostolike. Në vijim theksoi se imzot Bulaitis e kreu detyrën e tij diplomatike
në një periudhë të veçantë, që çoi në konsolidimin e marrëdhënieve diplomatike ndërmjet
dy palëve, me njohjen juridike të Kishës katolike nga ana e Shtetit shqiptar. Duke
falënderuar Shtetin shqiptar, diplomati i Vatikanit theksoi se Urdhëri i lartë është
më shumë shprehje e nderimit për Selinë Apostolike, sesa për atë personalisht. Në
ceremoninë e dorëzimit të Urdhërit të lartë, ishin të pranishëm edhe prelatët shqiptarë,
imzot Zef Gashi, kryeipeshkëv i Tivarit dhe imzot Lucian Avgustini, ipeshkëv i Sapës
si dhe disa autoritete të tjera diplomatike-kishtare. Kujtojmë se pak kohë më
parë në detyrën e Nuncit Apostolik, në vend të imzot Bulaitis, që doli në pension,
Papa Benedikti XVI emëroi Kryeipeshkvin spanjoll, imzot Ramiro Moliner Inglés, titullar
i Sardës, ish-Nunc Apostolik në Etiopi e në Gjibuti dhe delegat apostolik në Somali.