Ta kërkojmë me besim ndihmën dhe mbrojtjen e Engjëjve të Rojës.
(02.10.2008 RV)Të hënën e kaluar,
duke përshëndetur banorët e Kastel Gandolfos, Papa e kujtoi festën e sotme me këto
fjalë: “Të dashur vëllezër e motra, ta kërkojmë me besim ndihmën dhe mbrojtjen
e Engjëjve të Rojës, festën e të cilëve do ta kremtojmë më 2 tetor. Prania e padukshme
e këtyre shpirtrave të lum, na ndihmon e na ngushëllon fort: ata ecin përkrah nesh
e na mbrojnë në çdo rrethanë, na ruajnë nga rreziqet e mund t’u kërkojmë ndihmë në
çdo çast. Shumë shenjtorë – vijoi Papa - kishin me Engjëjt marrëdhënie
të vërteta miqësie e të shumta janë episodet, që flasin për ndihmën e tyre në raste
të veçanta: “Engjëjt dërgohen nga Zoti për t’i shërbyer atyre, që
do ta trashëgojnë shëlbimin, siç na e kujton Letra drejtuar Hebrenjve (1,14),
e na japin ndihmën e tyre në shtegtimin tokësor drejt Atdheut qiellor”. Engjët
e Rojës , pra, janë figura qiellore të pranishme në universin fetar e kulturor të
Biblës, si dhe në shumë besime të lashta. Paraqiten gjithnjë si qenie me krahë, simbol
i forcës ndërmjetësuese të Zotit tek njeriu. Fjala ëngjëll vjen nga greqishtja e lashtë
"anghelos - lajmëtar". Nuk është, prandaj, aspak e rastit që në gjuhën biblike termi
ëngjëll tregon një person të dërguar për të kryer një mision. Me këtë kuptim kjo fjalë
përdoret 175 herë në Besëlidhjen e Re e 300 herë në Besëlidhjen e Vjetër, ku flitet
edhe për funksionin e ushtrisë qiellore, të ndarë në nëntë shkallë hjerarkike: Kerubinët,
Serafinët, Fronet, Sundimet, Autoritetet, Virtytet qiellore, Principatat, Kryeengjëjt,
Engjëjt. Sot figurat e ëngjëjve vijojnë të kujtohen në predikimet liturgjike, madje
pëdoren shpesh si simbole edhe nga mjetet e komunikimit.Gjithsesi çdo i krishterë
e di se ka një engjëll rojës, i cili e shoqëron në çdo hap e të cilit i lutet çdo
mëngjes ta shndrisë, ta ruajë, ta mbrojë, ta sundojë.