Экс-кандыдат у прэзыдэнты, былы палітвязень Аляксандар Казулін увашоў у лік кандыдатаў
на прэмію Эўрапейскага парлямэнту „За свабоду думак” імя Андрэя Сахарава. Другім кандыдатам
зьяўляецца кітайскі праваабаронца Ху Джыа, які ў дадзены момант знаходзіцца ў зьняволеньні,
трэці кандыдат – гэта старшыня незалежнай выбарчай камісіі Дэмакратычнай Рэспублікі
Конга Эбот Апалінарый Малу Малу. Ляўрэат прэміі Сахарава стане вядомы ў сярэдзіне
кастрычніка, а ўручэньне ўзнагароды адбудзецца 17 сьнежня. Эўрапейскі парлямэнт
уручае прэмію з 1988 году. Гэта грашовая ўзнагарода памерам 50 тысяч эўра. Прадстаўнікі
Беларусі двойчы атрымлівалі ўзнагароду Эўрапарлямэнту: у 2004 годзе Асацыяцыя беларускіх
журналістаў, у 2006 – Аляксандар Мілінкевіч.