Në Poloni shpallet i lum Mihal Sopocko, rrëfyesi i Shenjtores Faustina Kovalska
(28.09.2008 RV)Mijëra besimtarë
e shtegtarë polakë u mblodhën sot në kishën e Mëshirës Hyjnore në Bialistok, për të
marrë pjesë në kremtimin eukaristik, me ritin e lumnimit të Shërbëtorit të Zotit,
Mihal Sopocko, rrëfyes i Shën Faustinës Kovalska e pararendës i kultit të Mëshirës
Hyjnore. Meshën Shenjte e kryesoi kryeipeshkvi dioqezan, imzot Eduard Ozorovski,
ndërsa formula e lumnimit u shqiptua nga kryeipeshkvi Anxhelo Amato, Prefekt i Kongregatës
për Çështjet e Shenjtorëve, përfaqësues i Atit të Shenjtë në kremtim. Postulatori
i Çështjes së lumnimit, imzot Kristof Nitkieviç, na e paraqet kështu meshtarin
polak, që u lartua sot në nderimet e lterit:
“Ishte meshtar i dhëmbshur
e zelltar, specialist në formimin e seminaristëve; atë shpirtëror, pedagog si në seminar,
ashtu edhe në universitet. Njihet posaçërisht si rrëfyesi i Shenjtores Faustina Kovalska.
Ishte i pari që u besoi vegimeve të saj, të cilat i hapën rrugën kultit të Mëshirës
Hyjnore. Më pas, me durim e përvujtëri, dha një ndihmesë të shquar në përhapjen e
këtij kulti, duke themeluar Kongregatën e rregulltareve të Krishtit të mëshirshëm
dhe Institutin shekullar të Mëshirës Hyjnore”.