23 верасня 2008 г. у Люрдзе (Францыя) кардынал Вальтэр Каспер, старшыня Папскай рады
спрыяння хрысціянскаму адзінству, будзе цэлебраваць святую Імшу, падчас якой кіраўнік
Англіканскай Епіскапальнай Царквы арцыбіскуп Кентэрберыйскі Роўэн Уільямс прамовіць
гамілію. У праграму каталіцка-англіканскай пілігрымкі таксама ўваходзіць малітва пры
Масабэльскім гроце.
Упершыню ў гісторыі ў Люрд прыбыла дэлегацыя Англіканскай
Епіскапальнай Царквы на чале з арцыбіскупам Кентэрберыйскім Роўэнам Уільямсам. Дэлегацыя
прымае ўдзел у юбілейных урачыстасцях у межах пілігрымкі англійскіх католікаў.
Кардынал
Вальтэр Каспер сцвярджае, што гэта падзея з’яўляецца выразным знакам духоўнага экуменізму:
«Гэту падзею можна назваць цудам, Люрд жа славіцца сваімі цудамі. Хіба гэта не цуд,
што англікане і католікі разам са сваімі біскупамі прабываюць там разам! (...) Гэта
значная падзея духоўнага характару, а значыць — не палітычнага і не тэалагічнага.
Бо менавіта духоўнасць з’яўляецца сэрцам і цэнтрам экуменізму. Я лічу, што Марыя дапаможа
гэтай нашай экуменічнай пілігрымцы».
«Той факт, што столькі англіканаў
мела жаданне прыехаць у Люрд, сведчыць пра тое, што многія з іх адчуваюць сябе блізка
Каталіцкага Касцёла і марыйнай пабожнасці, — адзначыў кардынал Каспер. — Для нас гэта
вельмі пазітыўны знак, які мы хацелі б падтрымаць. Вельмі знамянальным сігналам з’яўляецца
прысутнасць Кентэрберыйскага арцыбіскупа. Наш супольны каталіцка-англіканскі дакумент
трохгадовай даўнасці „Марыя — лаская і надзея ў Хрысце“ быў вельмі пазітыўным. У ім
дэкларавалася, можа, і не поўная згоднасць, але, прынамсі, значная ступень аднадушнасці
ў адносінах да Марыі. Гэта мае вялікае значэнне, бо ў мінулым гэтая тэма была надзвычай
палемічнай. Экуменізм — гэта справа не толькі тэалогіі, але таксама канкрэтнай набожнасці
людзей, і мы робім крок у гэтым напрамку».