“Feja nuk lind nga një mit e as nga një ide, por nga takimi me Krishtin e ngjallur,
në jetën e Kishës”.
(24.09.2008 RV)Feja jonë nuk lind
nga një ide, por nga takimi personal me Krishtin e ngjallur: këtë theksoi sot Benedikti
XVI gjatë audiencës së përgjithshme, mbajtur në Sheshin e Shën Pjetrit. Papa vijoi
katekizmin mbi jetën e Shën Palit. Benedikti XVI, gjatë katekizmit të sotëm, foli
për marrëdhëniet ndërmjet Palit e Apostujve, që shquheshin gjithnjë nga respekti i
thellë e njëkohësisht nga çiltërsia me të cilën Apostulli i Popujve mbronte të vërtetën
e Ungjillit. Posaçërisht domethënës takimi i tij me Shën Pjetrin, “shkëmbim mbi të
cilin po ngrihej Kisha”. Shën Pali – pohoi Papa – i tregon me besnikëri të gjitha
fjalët që dëgjoi prej Apostujve. Në Letrat e tij kanë rëndësi të veçantë fragmentet,
që lidhen me Eukaristinë e me Ngjalljen e Krishtit. Predikojmë të njëjtin Ungjill
– pohon Shën Pali - misioni i të cilit për të ungjillëzuar paganët, përfocohet nga
Apostujt: “Rëndësia që ai i jep Traditës së gjallë të Kishës, të cilën ajo ua
përcjell bashkësive të saj, dëshmon sa i gabuar është vizioni i atyre, që mendojnë
se Pali është shpikës i krishterimit. Para se ta kumtonte Jezu Krishtin, Zotin e tij,
ai e takoi në rrugën e Damaskut dhe e ndoqi pas në Kishë, duke e vëzhguar jetën e
Tij në të Dymbëdhjetët e në të gjithë ata, që e ndoqën pas rrugëve të Galilesë”. Kështu
Pali, nga persekutues i të krishterëve, u bë ungjillëzues i flakët i asaj feje në
Mesinë e kryqëzuar, që ia kishte kthyer përmbys jetën në rrugën e Damaskut. Prandaj
mund të themi se këtu nuk kemi të bëjmë me asnjë lloj shpikjeje por, përkundrazi,
me kumtimin e një fakti: “Feja jonë nuk lind nga një mit, as nga një ide, por
nga takimi me të Ngjallurin, në jetën e Kishës”. Duke iu drejtuar, në përfundim
të katekizmit, besimtarëve të Republikës çeke, Benedikti XVI kujtoi se të dielën e
ardhshme Kisha në këtë vend do të kremtojë solemnitetin e Shën Vençeslaut, pajtor
kryesor i Kombit çek. Benedikti XVI i ftoi katolikët çekë ta ruajnë trashëgiminë e
tyre shpirtërore dhe t’ua përcjellin të pacënuar breznive të reja. Duke përshëndetur
besimtarët portugezë, i nxiti të krishterët t’u tregojnë të gjithëve se lumturi mbi
këtë tokë do të thotë të duash Jezu Krishtin. Në fund i drejtoi përshëndetjen një
grupi të rinjsh të Shoqatës Dallandyshja-Qyteza e paqes e Arecos, disa nga të cilët,
ardhur nga Kaukazi, duke uruar afirmimin e kulturës së bashkëjetesës paqësore ndërmjet
popujve dhe promovimin e mirëkuptimit e të pajtimit.