Zimbabve: u nënshkrua fundi i krizës politike

(15.09.2008 RV)Ditë e rëndësishme sot në Zimbabve, ku gjatë një ceremonie zyrtare në Harare, u sanksionua fundi i krizës politike që zgjati 5 muaj pas zgjedhjeve presidenciale. Presidenti Mugabe dhe lideri i opozitës Cvangirai nënshkruan marrëveshjen e arritur të enjten e kaluar, pas 8 javë bisedimesh të ndërmjetësuara nga presidenti jugafrikan Mbeki. Marrëveshja parashikon formimin e një qeverie të bashkimit kombëtar, me kryeministër Cvangirain, i cili do të marrë në dorë edhe drejtimin e një ministrie strategjike. Presidenca e vendit i mbetet Mugabes, që do të kontrollojë edhe Këshillin e Ministrave dhe ushtrinë. Qeveria e re do të përbëhet nga 31 ministra. Gjatë ceremonisë, Cvangirai bëri thirrje për bashkim, ndërsa Mugabe paralajmëroi vendet e huaja, sidomos Britaninë e Madhe dhe SHBA-në, të mos ndërhyjnë në punët e brendshme të Zimbabvesë. Bashkimi Evropian ka vendosur të presë “masa konkrete”, para se të rifillojë ndihmat ekonomike për vendin afrikan.