Benedikti XVI gjatë Procesionit Eukaristik : “Mos e kundërshtoni dashurinë e Krishtit!”.
(14.09.2008 RV)Pas takimit me ipeshkvijtë, Benedikti XVI mori pjesë, si shtegtar
në mes të shtegtarëve, në Procesionin Eukaristik, që përfundoi në Prairie di Lourdes,
apo në Livadhet e Lurdës, rreth 9 hektarë tokë, përballë Shpellës dhe Kishës kushtuar
Shën Bernardetës. Këtu, në mes të blerimit, në tribunën-elter, ngritur për kremtime
meshësh, lutjesh e reflektimesh, mbuluar me një ‘Velum’, apo tendë, Papa kremtoi përfundimin
e Procesionit Eukaristik. Ati i Shenjtë i ftoi të gjithë të kundrojnë Krishtin,
atë që ua dhuroi Korpin e Gjakun e vet nxënësve të tij, për të qenë me ta gjithnjë,
deri në fund të fundit të botës. E në këtë kundrim, të kujtojnë se Ai e dëshiron jetën
tonë, që ta bashkojë me të Tijën. Lëreni veten t’ju pushtojë – bëri thirrje Papa.
- Mos shikoni më plagët tuaja, por të Tijat. Mos shikoni ç’ju ndan nga Krishti e nga
të tjerët, por distancën e pafundme që Ai e shleu, duke marrë korpin njerëzor, duke
u ngjitur në kryqin që ia përgatitën njerëzit e duke e lënë veten të kryqëzohej, për
dashuri. Ai të pret në plagët tij, të fsheh në plagët e tij! Mos e kundërshto dashurinë
e tij!”. Jezu Krishti është i pranishën - vijoi Papa – e Eukaristia është Jezusi
i sotëm, por edhe Jezusi i ardhshëm, Jezu Krishti që do të vijë. Kur kundrojmë Hosten
Shenjte, Korpin e tij të lumnuar, të shndërruar e të ngjallur, kundrojmë atë, që do
ta kundrojmë në amshim e kumtojmë se Ai do të vijë! Disa nga ne – shpjegoi Papa
– nuk mund ta marrin ende sakramentin, por mund ta kundrojnë me fe e dashuri e të
shprehin, më në fund, dëshirën të bashkohen me Të! Benedikti XVI e përfundoi meditimin
me një lutje të të Lumit Sharl de Fuko, që mund ta thotë çdo besimtar para Hostes
Shenjte:
“Ati im, në duart tua po e lëshoj shpirtin!”. Është lutja
e fundme e Mësuesit tonë, e të dashurit tonë… U bëftë edhe lutja jonë, e
jo vetëm lutja e çastit të fundit, por lutja e çdo çasti. Ati im, jam në
duart tua! Atë, ta besoj gjithë vetveten! Atë, të përkas me gjithçka; Atë, bëj me
mua atë që dëshiron; jam gati, pranoj gjithçka. Të falënderoj për gjithçka. U bëftë
vullndesa jote mbi mua e mbi të gjitha krijesat, mbi të gjithë bijtë e tu, mbi të
gjithë ata, që zemra jote i do! Po e lë në duart e tua shpirtin tim; po
ta dhuroj me gjithë zemër, sepse të dua pa masë, me besim të pafundmë, Ty, që je Ati
im”.
Benedikti XVI e përfundoi ditën e parafundit të shtegtimit të tij
apostolik në Francë, në Eremitazhin e Shën Jozefit, ku po pushon, për të rifilluar,
nesër veprimtaritë, me etapën e katërt të Shtegtimit Jubilar. Ati i Shenjtë do të
vizitojë Oratorin e spitalit e më pas, në Bazilikën e Zojës Rruzare, do të kremtojë
Meshën për të sëmurët.