Пачнём ад учарашняга дня, ад здарэньняў, якія мелі месца пасьля вячэрняга выпуску
нашае праграмы. Менавіта вельмі важным была сустрэча Папы з культурным сьветам.
Перад гэтаю сустрэчаю каля гадзіны 17-й французскага часу, ў пятніцу 12-га верасьня,
ў Апостальскай Нунцыятуры ў Парыжы адбылася кароткая сустрэча Папы з прадстаўнікамі
Гэбрэйскае Супольнасьці Францыі. Прыпомнім толькі, што гэбрэі разам з захадам сонца
пачынаюць сваё рэлігійнае сьвята “Шабат”. Дзеля гэтага сустрэча з імі адбылася раней
ў “Коледж дэс Бэрнардін”. Прадстаўнікам культурнага сьвету Францыі Папа гаварыў
аб пачатках заходняе тэалогіі і каранях эўрапэйскае культуры. Прыпомніў ролю, якую
ў пэрыядзе хуткіх культурных перамен, што спрычынілі міграцыі народаў і ўзьніканьне
новых дзяржаваў, мелі на Захадзе манастыры. У іх перахоўвана скарбы антычнае культуры
і чэрпаючы з іх, была стварана новая культура. Жаданьнем манахаў не было аднак будаваньне
новае культуры ані зьбераганьне старое. Іх мэтаю было шуканьне Бога. Іхняю дарогаю
было Слова Божае, дадзенае людзям у Кнігах Бібліі. Каб яго пазнаць мусілі паглябляць
тайны мовы. Дзеля гэтага бібліятэка і школа станавілі цэласную частку манастыра.
Бэнэдыкт 16 прыпомніў таксама значэньне, якое для іхняе малітвы меў сьпеў. Так ўзьнікла
вялікая музыка Захаду. У сустрэчы са сьветам культуры прыняло ўдзел многа вядомых
постацей, ў гэтым былыя Прэзыдэнты Францыі, Жак Шырак і Валеры Жыскар Дэстэн ці былы
кіраўнік Эўрапэйскае Камісіі Жак Долёр.