Kriza diplomatike ndërmjet Bolivisë dhe SHBA përhapet edhe në vende të tjera të Amerikës
Latine
Edhe Venezuela e dëboi ambasadorin amerikan. Në Bolivi, u vranë të paktën tetë persona
në përleshjet që shpërthyen orët e fundit, ndërmjet mbështetësve dhe kundërshtarëve
të presidentit Evo Morales. Dhuna shpërtheu pas dëbimit nga Bolivia të ambasadorit
amerikan akuzuar si “nxitës i përçarjes” në vend. Në shenj solidariteti me Bolivinë
edhe qeveria e Venezuelës i kërkoi ambasadorit amerikan të kthehet në vendin e tij.
Ndërkaq në Bolivi klasa politike duket gjithnjë e më e përçarë. Çka nxit përplasjet
e rrepta, tashmë prej vitesh, është nxjerrja dhe përdorimi i gazit. Po ashtu kërkesave
të disa krahinave për autonomi iu shtohen edhe kundërshtimet lidhur me kartën e re
kushtetuese.
Pas pesë muajsh krize politike e me vendin në prag të humnerës,
dje në Zimbabve pati një kthesë politike. Robert Mugabe, që mban postin e presidentit
dhe kryetari i opozitës të Lëvizjes për ndryshime demokratike, Morgan Cvangirai, që
do të bëhet kryeministër, nënshkruan një marrëveshje për ndarjen e pushtetit. Marrëveshja
që do të nënshkruhet zyrtarisht të hënën e ardhshme në Harare, shënon lindjen e një
qeverie të bashkimit kombëtar.