Kalendari liturgjik katolik kinez 2009 do t’i kushtohet devocionit marian në botë.
(09.09.2008 RV)Sipas njoftimit që i jep agjensisë Fides drejtori i Faith, shtëpia
më e madhe botuese katolike në Kinën kontinentale, besimtarët katolikë kinezë përgatiten
ta ndjekin vizitën e Benediktit XVI në Lurdë për kremtimin e 150 vjetorit të Dukjeve
të Zojës së Bekuar, me një devocion të jashtëzakonshëm marian. Katolikët kinezë kanë
qenë gjithnjë të devoçmit e Zojës – vijon të shpjegojë drejtori i Faith - por sivjet,
falë edhe lutjes së Atit të Shenjtë drejtuar Zojës së Sheshanit, devocioni vijon të
bëhet gjithnjë më i thellë. Kremtimi jo i largët i të Ngjiturit të Zojës në qiell,
më 15 gushtin e kaluar, është një rast simbolik, që na bind për këtë devocion. Në
kulmin e gushtit, në mes një vape, që të merrte frymën, besimtarët i mbushën plot
të gjitha kishat dhe qendrat e lutjeve. Prandaj u vendos që Kalendari t’i kushtohet
devocionit marian në botë, për ta jetuar në përkim me gjithë besimtarët e Kishës Universale,
duke iu përgjigjur kështu edhe mësimeve të Papës.