Sot Kisha katolike kremtoi ditëlindjen e Shën Marisë Virgjër.
(08.09.2008 RV)Me përkujtimin e
kësaj dite, që tradita e njeh me emrin “Të lémët e Zojës”, kremtojmë ditëlindjen e
Virgjërës Mari, Nënës së Tënzot, në kraharorin e së cilës u mishërua Jezu Krishti. Kjo
festë nis të kremtohet për herë të parë me dëshirën e Papës Sergji I në shekullin
VII, kryesisht në Kishat lindore. Lindja e Virgjërës lidhet në mënyrë të pazgjidhshme
me ardhjen e Mesisë, si premtim, përgatitje e fryt i shëlbimit. Agim që i paraprin
diellit të drejtësisë, Maria i paralajmëron mbarë botës gëzimin e lindjes së Shëlbuesit.
Është, prandaj, guri i kufirit ndërmjet Besëlidhjes së Vjetër dhe Besëlidhjes së Re.
Errësira e natës tërhiqet, ndërsa nis të duket agimi i ditës së re, që na sjell lirinë
në vend të robërisë së ligjit të vjetër. Gjithë krijesa këndon nga gëzimi i kësaj
dite, njerëz e engjëj bashkohen për të marrë pjesë në kremtimin e liturgjisë së sotme.
Është dita në të cilën Krijuesi i gjithësisë ndërtoi tempullin e vet, dita në të
cilën, përmes një projekti të mrekullueshëm, krijesa bëhet banesë e zgjedhur e Krijuesit.
Festa e sotme, që shënon fillimin e shëlbimit tonë, na sjelltë bashkimin e paqen
me ndëmjetësinë e Vashës së Nazaretit.