Në Kaliari, Papa ia beson Virgjërës Mari familjet e të rinjtë. Në Engjëllin e Tënzot,
lutet për popullsinë e Haitit, të dëmtuar nga uraganet.
(07.09.2008 RV)Sot Benedikti XVI
ishte në Kaliari për njëqindvjetorin e shpalljes të Zojës së Bonarias ‘Pajtore e posaçme
e gjithë ishullit të Sardenjës”. Një vizitë apostolike kushtuar Virgjërës Mari, së
cilës Papa ia besoi, posaçërisht, familjet e të rinjtë. Ati i Shenjtë arriti në
Kaliari sot paradite, rreth orës 9. 30. U prit nga kryeipeshkvi i kryeqendrës sarde,
Gjuzepe Mani, nga kryeministri italian, Silvio Berluskoni dhe autoritete të tjera
civile e kishtare. Vizita e parë - në Shenjtëroren kaliaritane, në sheshin para
së cilës kremtoi Meshën Shenjte dhe lutjen e Engjëllit të Tënzot. Një kremtim që u
ndoq me emocion nga një turmë besimtarësh në festë. Nga Kaliari, shërbim i të
dërguarit tonë, Salvatore Sabatino:
“Kaliari e Sardenja u shtrënguan
sot rreth Papës në një përqafim të sinqertë. I përshëndetur nga mijëra njerëz në të
dy anët e rrugëve që përshkoi, Papa shkoi menjëherë në Shenjtëroren e Zojës së Bonarias
për kremtimin e Meshës. U prit me tingujt e ‘launedas’, një instrument muzikor tipik
i kësaj toke, e nga shumë të rinj me kostume popullore, simbol i pasurisë kulturore
e historike të kësaj toke të lashtë. Secili prej tyre përfaqësonte një nga komunat
e Sardenjës, sikur donin të thoshin: jemi këtu, të gjithë, për të pritur Papën. Së pari Ati i Shenjtë u takua me të sëmurët e qindvjeçarët. Pastaj, nga
elteri i bardhë, ngritur me këtë rast në sheshin para Shenjtërores, që sundon nga
maja e kodrës mbarë gjirin e Kaliarit, Benedikti XVI e nisi homelinë, duke shprehur
admirimin për pritjen: “Shfaqja më e bukur, që mund të japë një popull
është, pa dyshim, ajo e fesë së tij. Në këtë çast unë prek me dorë fenë që ju frymëzon,
e për këtë dua t’ju shpreh menjëherë admirimin tim”. Gjatë homelisë
Papa foli për historinë e krishterimit në Sardenjë, për dëshmimin e fesë nga martirët
e vendit e, sidomos, për lidhjen e ngushtë me Selinë e Shën Pjetrit: “Sardenja
nuk ka qenë kurrë tokë herezish; populli i saj mbeti gjithnjë besnik ndaj Krishtit
e Selisë së Shën Pjetrit. Po, të dashur miq, edhe gjatë pushtimeve e sundimeve, që
pasuan njëri-tjetrin, feja në Krishtin mbeti e gjallë në shpirtin e popullsive tuaja,
si element ndërtimtar i vetë identitetit tuaj sard”. E më pas Papa,
duke kujtuar njëqindvjetorin e shpalljes së Zojës Pajtore kryesore e Ishullit, tha
në dialektin vendas: “Sa Mama, Fiza, Isposa de su Segnore… Ajo
është Nëna, Bija, Nusja” – siç i këndoni në këngët tuaja”. Vijoi, pastaj,
me një FalemiMëri, gjithnjë në dialekt, e me urimin: “Zoja e Bonarias ju ndihmoftë
ta çoni Krishtin në familje, kisha të vogla shtëpijake e qeliza të shoqërisë. Ju ndihmoftë
të gjeni strategjitë e nevojshme baritore, për t’i hapur Krishtit rrugën e takimit
me të rinjtë, që janë të etur për të vërtetën e idealet, pikërisht atëherë kur duket
sikur i mohojnë: “Ju bëftë të aftë për të ungjillëzuar botën e punës,
të ekonomisë, të politikës, që ka nevojë për një brezni laikësh kristianë të impenjuar,
të aftë për të kërkuar me kompetencë e rreptësi morale, rrugëzgjidhje për një zhvillim
të qëndrueshëm”. Breznitë e sardëve - përfundoi Papa - do të vijojnë
të ngjiten tek Shenjtërorja, për të kërkuar ndihmë nga Zoja e Bonarias, Nëna e mëshirshme
e e pushtetshme, e nuk do të mbeten kurrë të zhgënjyer. Para lutjes së Engjëllit
të Tënzot, një çast vërtetë solemn. Benedikti XVI vendosi në dorën e djathtë të shtatores
së Zojës së Bonarias, një barkë të vogël dhe një qiri, simbol i fesë së sardëve. Për
ta theksuar këtë çast, sirenat e barkave që ndodheshin në det, përballë Shenjtërores,
ranë të gjitha përnjëherësh, ndësa Papa vendoste tek këmbët e Virgjërës, një trëndafil
të artë".
Edhe lutjen e Engjëllit të Tënzot, Benedikti
XVI ia kushtoi Zojës së Bonarias, të cilën e quajti ‘Mbretëreshë e ëmbël e sardëve’
dhe ia besoi përsëri qytetin e Kaliarit, Sardenjën dhe të gjithë banorët e saj. E
në përfundim të lutjes, Ati i Shenjtë kujtoi Haitin: “Nën vështrimin e Marisë,
dëshiroj të kujtoi popullsitë e dashura të Haitit, të vëna në provë të rëndë këto
ditë nga kalimi i tre uraganeve. Lutem për viktimat, për fat të keq, të shumta, e
për të pastrehët. Jam pranë gjithë Kombit e uroj që t’i arrijnë sa më shpejt ndihmat
e nevojshme. Ia besoj të gjithë mbrojtjes së Zojës së Bonarias”.