Në audiencë tek Papa, presidenti i Rumanisë, Basesku vlerësoi mbështetjen e Kishës
për integrimin e rumunëve jashtë shtetit.
(06.09.2008 RV)Roli i Rumanisë në Bashkimin Evropian, por edhe integrimi i
bashkësive rumune jashtë vendit dhe marrëdhëniet me Kishën ortodokse ishin argumentet
kryesore që diskutuan sot paradite Papa Benedikti XVI dhe presidenti i Rumanisë, Trajan
Basesku, i cili u prit në Vatikan. “Bisedimet e përzemërta – pohon komunikata e Sallës
së Shtypit të Selisë së Shenjtë – bënë të mundur që të flitej për situatën në vend,
duke iu referuar veçanërisht integrimit të tij në Bashkimin Evropian, të prekeshin,
në atë kontekst, temat e identitetit historik, kulturor e shpirtëror të Kontinentit,
të vihej në dukje gjithashtu afërsia e qëndrimeve të Selisë së Shenjtë dhe të Rumanisë
në fusha të ndryshme ndërkombëtare”. U diskutuan edhe “disa çështje që kanë të
bëjnë me marrëdhëniet ndërmjet Kishës Katolike dhe Shtetit rumun, si edhe me marrëdhëniet
me Kishën Ortodokse, duke uruar – nënvizon nota e Vatikanit – që rritja e mirëkuptimit
dhe e bashkëpunimit të anasjelltë të kontribuojë në të mirën e krejt banorëve të vendit
dhe në përparimin e tyre shpirtëror e material”. Së fundi, përfundon komunikata zyrtare,
“nuk mungoi edhe argumenti i bashkësive rumune jashtë shtetit, për integrimin jo gjithnjë
të lehtë të të cilave, institucionet e Kishës Katolike ofrojnë një ndihmë bujare dhe
efikase, që presidenti Basesku e njohu dhe e vlerësoi shprehimisht”.