Liturgjia e Fjalës e dielës së 23-të gjatë vitit kishtar ‘A’
(06.9.2008 R.V.)Ja përsëri në takimin
tonë javor të së shtunës me Fjalën e Zotit të meshës së dielës, kësaj here do të dgjojmë
e meditojmë së bashku leximet biblike të liturgjisë së Fjalës Hyjnore të dielës së
23-të gjatë vitit kishtar, ciklit të parë, sipas kalendarit liturgjik të kishës. Leximet
biblike të kësaj së diele na paraqesin përmasen kishtare, duke pasur parasysh marrdhëniet
e anëtarëve të Kishës në brendësinë e saj. Misteri i Kishës jetohet e përjetohet në
nivele të ndryshme të strukturës së saj të dukshme, pra të jashme, por realizohet
përgjithësisht në dashurinë e jetës që karakterizon sjelljet e secilit në marrëdhëniet
e përditshme të jetës së tij. Bashkësia fetare rritet me gjestet konkrete të dashurisë:
korrigjimin apo ndreqjen e bagimeve vëllazërore dhe me lutje. Cdo korrigim i vërtetë
buron vetëm nga dashuria që ia kemi borxh vëllaut e të afërmit tonë e këtë detyrë
të dashurisë së korrigjimit ndaj vëllaut që gabon e mëkaton duhet ta bëjmë me ndërgjegjësi
njerëzore e të krishterë. Gjithmonë duhet ta kryejmë plotë me përvujtëri e me forcë
ungjillore. Jezusi në Ungjillin e kësaj së diele na thotë se në dialogun vetëm për
vetëm me vëllaun, është e mundur ta “shpëtosh” ” vëllanë tënd, që do të thotë ta
ri-fitosh e ri-kthesh bashkimin e jetës e harmoninë e vëllaut që ka gabuar e mëkatuar.
Kështu pra, mund të themi se tema qendërore e leximeve biblike të kësaj së diele
është miqësia e vëllazërimi ndërmjet të gjithë anëtarëve që formojnë e përbëjnë bashkësinë
kishtare. Pra leximet biblike të kësaj së diele na ofrojnë për meditim e si udhëzim
për rregullimin e marrëdhënieve të ndërsjellta në jetën e përditshme dashurinë dhe
qortimin vëllazëror. Cdo i krishterë e ka për detyrë këtë urdhër të dashurisë e
të qortimit vëllazëror të anasjelltë, sepse ne jemi anëtarë të të njëjtit trup mistik,
e për tërë organizmin nuk është punë indiferente nëse një anëtar i saj e dëmton apo
lëndon vetveten me gabime e mëkate sepse në atë mënyrë e prekë edhe jetën e të gjithë
anëtarëve të tjerë të bashkësisë. Qortimi, e nëse është nevoja edhe korrigjimi mund
e duhet të bëhët por gjithmonë në atë mënyrës që na porosit Ungjilli, duke synuar
rifitimin e kthimin e të afërmit e të vëllaut tonë e asesi gjykimin e tjetërit. Kurrë
pa tjetërin. Në leximin e parë nga Ezekieli profet, Zoti na thotë: ty të kam vënë
si rojtar e si zë për vëllezërit tu. Në leximin e dytë të kësaj së diele Palit na
kujton se: “keni vetëm një detyrim atë të dhurimit të dashurisë reciproke” . E
tani ju ftojmë ti dëgjojmë leximet biblike të liturgjisë së Fjalës Hyjnore të dielës
së 23-të gjatë vitit kishtar, së bashku me homelinë….