(04.09.2008 RV)Dje Benedikti XVI
bekoi një shtatore bronzi të Nënë Terezës, të gjatë tri metra, realizuar nga një artist
maqedon e dhuruar Papës në përfundim të audiencës së përgjithshme. Me duart e
bashkuara në shenjë lutjeje e me gishtat e këmbëve të shtrembëruar nga lodhja e kilometrave
që përshkuan rrotull botës, shtatorja e Nënë Terezës në bronz, të cilën skulptori
ia dhuroi Benediktit XVI, vijon të transmetojë mesazhin se Zoti i do të gjithë njerëzit,
pa dallim race e feje. Vepra të kujton se, për ta realizuar misionin e saj fetar,
Nënë Tereza nuk pati nevojë për shumë fjalë. Mjaftonte ta shikoje, për t’u bindur
sa e thellë ishte feja e saj, shpresa e saj e dashuria e saj. E mjafton ta shikosh,
të derdhur në bronz, për të krijuar të njëjtën bindje e për të kuptuar si arriti të
thirrej Nënë nga të gjithë, e posaçërisht në Indinë ku ndiqen shumë fe e ku sot po
thellohen tensionet ndërfetare. Papa do t’ia dhurojnë shtatoren famullisë romake,
në ndërtim e sipër, që do të mbajë emrin e Rregulltares së Lume. Deri atëherë, do
të ruhet në oborrin e shtëpisë së misionareve të dashurisë ‘Dhurata e Marisë’, në
Vatikan. Dje, në ceremoninë e dorëzimit të shtatores ishin të pranishëm edhe ipeshkvi
e kryetari i bashkisë së Shkupit, qytet ku lindi Nënë Tereza.