Benedikti XVI në audiencën e përgjithshme: “Si për Shën Palin në Damask, kthimi është
fryt i takimit personal me Krishtin".
(03.09.2008 RV)Njeriu kthehet në
rrugë të Krishtit e jo në rrugën e teorive filozofike, as të kodeve morale, pikërisht
si Shën Pali, që u kthye, pasi u takua personalisht me Jezusin e, prej këndej, vendosi
t’i shërbejë e ta kumtojë me të gjitha energjitë e veta. Këtë theksoi Benedikti XVI
në përfundim të audiencës së sotme të përgjithshme, mbajtur në Sallën e Palit VI në
Vatikan, para rreth 8 mijë besimtarëve e shtegtarëve nga vende të ndryshme të botës. Ekziston
një portë e Damaskut për çdo të krishterë që është vërtetë i tillë, domethënë, që
e ka jetuar përvojën e drejtpërdrejtë e vetjake të dashurisë së Zotit deri në atë
pikë, sa ta drejtojë nga kjo dashuri gjithë jetën e vet. Kështu i ndodhi Palit të
Tarsit, armik i betuar i ndjekësve të parë të Jezusit e pastaj, ai vetë ndjekës e
kumtues i jashtëzakonshëm i fjalëve të Zotit. Benedikti XVI u shpreh qartë: kthimi
i Shën Palit nuk qe aq çështje dritash verbuese e rëniesh nga kali, sa një zbulesë
verbuese shpirtërore, takim i thellë me Krishtin deri në atë pikë, sa t’ia ndryshojë
rrënjësisht e pa ndërruar mendje, gjithë rrjedhën e jetës së tij. E pikërisht në
kthimin e Shën Palit, ashtu siç pati paralajmëruar në katekizmin e kaluar, Papa u
ndalua gjatë, duke shpjeguar si duhet kuptuar, përtej ‘hollësive piktoreske’, siç
i quajti ai vetë – ‘të dritës që vjen nga qielli, të rrëzimit përdhe, e të zërit
që i flet”, të cilat na i tregon Shën Luka në Veprat e Apostujve: “Shën Pali,
pra, u shndërrua jo nga një mendim, por nga një ngjarje, nga prania e papërballueshme
e të Ngjallurit, për të cilën nuk do të mund të dyshonte kurrë më, sepse ishte tepër
e fortë qartësia e kësaj ngjarjeje. Ajo e shndërroi thellësisht jetën e Palit; në
këtë kuptim mund e duhet folur për kthimin”. Papa i dalloi burimet e para,
nga ato të një tipi tjetër, shumë më afër së vërtetës, dmth vetë Letrat e Shën Palit.
Në to Apostulli e cek disa herë përvojën e tij të jashtëzakonshme. Por – vijoi të
shpjegonte Benedikti XVI - rrëfimi i Palit është i thjeshtë, pa hollësira. Ajo që
ka më tepër rëndësi për Shën Palin – nënvizoi Papa – është të tregojë se me ngjarjen
e madhe të Damaskut, edhe ai u bë “dëshmitar i Ngjalljes së Jezusit” e se, njëlloj
si Apostujt e tjerë, edhe ai mori nga Jezusi ‘zbulesën dhe misionin’ për t’ua kumtuar
Ungjillin paganëve të botës greko-romake. Një e dhënë tjetër e rëndësishme, pastaj,
është se vetë Shën Pali nuk e përdor kurrë termin ‘kthim’. Papa e shpjegoi kështu
psenë: “Ka shumë hamendje, por për mua shkaku është i qartë. Kjo kthesë e jetës
së tij, ky shndërrim i gjithë qenies së tij, nuk ishte fryt i një procesi psikologjik,
i një pjekurie ose i një evolucioni intelektual e moral, por erdhi nga jashtë: nuk
qe fryt i mendimit të tij, por i takimit me Krishtin Jezus. Në këtë kuptim, nuk ishte
thjeshtë kthim, pjekuri e ‘unit’ të tij, por vdekje e ringjallje për atë vetë: vdiq
një ekzistencë e tij e një tjetër, e re, lindi me Krishtin e Ngjallur”. Përvojën
e jashtëzakonshme, të cilën e jetoi, Shën Pali nuk e kufizon në ngjarjen që ndodhi
30 vjet pas Krishtit. Kjo ngjarje – vërejti Benedikti XVI - u thotë diçka shumë më
të rëndësishme edhe të krishterëve të kohëve tona: “Do të thotë se edhe për
ne, krishterimi nuk është filozofi e re, e as moral i ri. Jemi të krishterë, vetëm
në se takojmë Krishtin (...) Edhe ne mund ta takojmë Krishtin, në leximin e Shkrimit
Shenjt, në lutje, në jetën liturgjike të Kishës. Mund ta prekim zemrën e Krishtit
e të ndjejmë se edhe Ai e prek zemrën tonë. Vetëm në këtë marrëdhënie personale me
Krishtin, vetëm në këtë takim me të Ngjallurin, bëhemi vërtetë të krishterë (…). Prandaj
t’i lutemi Zotit të na ndriçojë, t’i dhurojë botës sonë takimin me praninë e Tij:
e kështu, të na japë një fe të gjallë, një zemër të hapur, një dashuri të madhe për
të gjithë, të aftë për t’ia ndryshuar faqen botës”.