(02.09.2008 RV)Vijon, këto ditë,
në Vatikan, vizita ‘ad Limina’ e ipeshkvijve të Nikaraguas të cilët, pasi vizituan
dikasteret e ndryshme vatikanase, do të priten në audiencë nga Papa Benedikti XVI. Me
130 mijë kilometrat katrore të territorit të saj, Nikaragua është shteti më i madh
i Amerikës qendrore dhe një nga më të varfërit e hemisferës lindore. 89% e 5 milionë
banorëve të saj, janë katolikë. Kisha nikaraguane ka një kryedioqezë, gjashtë dioqeza
e një vikariat apostolik. Konferencën ipeshkvnore e kryeson kryeipeshkvi i Managuas,
imzot José Brenes Solorzano. Gjon Pali II e ka vizituar dy herë vendin, më 1983 dhe
më 1996. Kisha e Nikaraguas, gjatë veprimtarisë së saj kryesore për kumtimin e
Ungjillit, impenjohet gjithnjë në luftën kundër varfërisë, për paqen e zhvillimin
shoqëror. Por beteja e saj kryesore është ajo për mbrojtjen e jetës e të familjes,
siç shprehet edhe kryetari i ipeshkvijve të vendit, imzot Brenes, në mikrofonin
e Radio Vatikanit: “Ne e dimë se një re e dendur e kërcënon Kishën: përpjekja
për miratimin e abortit. Po përpiqemi ta përforcojmë punën baritore me familjen, përmes
komisioneve tona baritore, duke vënë në qendër të vëmendjes sidomos katekizmin me
të rinjtë, që nesër do të jenë kryetarë familjesh. Puna baritore me familjen
është një nga veprimtaritë tona kryesore, së bashku me baritorinë rinore dhe edukative.
Këto janë edhe tri drejtimet kryesore të veprimtarisë sonë, pa harruar edhe punën
për thirrjet meshtarake”.