(31.08.2008 RV)“Kujdes!”, bërtet punëtori, duke e parë Gijomin kaluar mbi një
tra të makinës që grin letrën në fabrikën, ku punon i jati. Dymbëdhjetëvjeçari zbret
nga kali i tij imagjinar, por sapo largohet punëtori, ia nis përsëri të kalërojë afër
ingranazheve që vënë në lëvizje makinën e rëndë. Gijomi humbet drejtpeshimin, rrëshqet
e bie: kjo makinë e skëterrshme do ta bëjë grima-grima. Në atë çast, të shpejtë si
vetëtima, djali i lutet Zojës së Bekuar ta shpëtojë, duke bërë kushtin të shkojë në
mision. Makina ndalet! Gijom Duarr tani duhet ta mbajë premtimin… Kalojnë disa
vjet e më 1834 Gijomi shugurohet meshtar. Tetë vjet më pas emërohet ipeshkëv i Amatës,
në Kaledoninë e Re e niset mbi një anije, së bashku me katër meshtarë të tjerë, për
të arritur sa më parë në dioqezën e tij të re. Kur arrijnë, kajakët bëhen shumë
kureshtarë e i prekin të sapoardhurit, duke kërcitur dhëmbët. “Uhhh…. Miqtë tanë
të rinj janë kanibalë… në se nuk gabohem”, mërmëron njëri nga priftërinjtë. “Në
të vërtetë, edhe unë e kam dëgjuar këtë, por nuk u duhet besuar kurrë thashethemeve”,
përgjigjet prifti tjetër, krejt i qetë. Vitin e parë meshtarët punojnë rëndë. Sipas
rasteve, bëhen karpentierë, gjahtarë, peshkatarë ose katundarë. Mësojnë edhe gjuhën
e vendit, për t’u shpjeguar kajakëve se vjedhja, gënjeshtrat e kanibalizmi nuk janë
virtyte të krishtera. Por shumë shpejt, një zi buke e, pas saj, edhe një epidemi,
e përgjysmojnë popullsinë, që nis t’i akuzojë meshtarët për këto kobe. Atyre u duhet
të ikin në Australi. Por imzot Duarr nuk e merr fare parasysh rrezikun që i kërcënohet.
As që i shkon nëpër mend të heqë dorë nga misioni i tij në Kaledoninë e re. I shkruan
letra pas letrash episkopatit dhe qeverisë franceze, duke kërkuar të dërgojnë njerëz
në Kaledoninë e Re. Në këtë kohë ishulli është i pavarur e Anglia ka shumë synime
mbi të. Gijomi e di mirë se, po vunë dorë anglezët mbi ishullin, misioni i tij do
të marrë fund. Pasi kishte kërkuar disa herë të themelonte misione të reja, Gijom
Duarr vdes, viktimë e një epidemie. Nuk mundet, kështu, të jetë i pranishëm në çastin
kur admirali francez, Fevrie-Dë-Pojnt, hyn në ishull. Letrat e Gijomit nuk shkuan
kot e misioni i tij shpëtoi. Njëzet vjet pas arritjes së misinarëve, ishulli do të
kishte më se 200 shkolla, në të cilat mësohej, në radhë të parë, katekizmi!