Rusia njeh pavarësinë e Osetisë së jugut e të Abkhazisë. Acarohet gjendja me Nato-n
(26.8.2008 RV)Mungonte vetëm “po”ja e Kremlinit per pavarësinë e provincave
separatiste gjeorgjiane për ta bërë situatën në Kaukaz edhe më të nderë e marrëdhëniet
ndërmjet Nato-s dhe Moskës edhe më të tensionuara se janë. Presidenti rus Dimitri
Medvedev, lajmëroi se nënshkroi dekretin me të cilin Rusia njeh formalisht pavarësinë
e Osetisë së jugut dhe Abkhazisë. Medvedevi, gjatë fjalimit drejtuar kombit transmetuar
nga televizioni shtetëror në fund të mbledhjes të Këshillit të Sigurisë në Soçi, në
Detin e Zi, u bëri thirrje edhe vendeve të tjera të bëjnë kështu. Por kjo ftesë deri
tani është refuzuar nga Franca e cila e quajti si “të dënueshëm” vendimin marrë nga
Moska për njohjen e pavarësisë së Abkhazisë dhe Osetisë së jugut. I menjëhershëm reagimi
i Tbilisit: “Vendimi i marrë nga Rusia nuk ka asnjë vlerë ligjore”, deklaroi sekretari
i Këshillit për Sigurinë Kombëtare të Gjeorgjisë Aleksandër Lomaia. “Njohja e provincave
separatiste gjeorgjiane si shtete të pavarura do të ketë 'pasoja të rënda politike'
për Rusinë,” shtoi Lomaia. E ndërkaq udhëheqësit e provincave separatiste e mirëpritën
vendimin e Rusisë për t’ua njohur pavarësinë duke e përkufizuar si një hap “historik”. Kurse
Ministri i jashtëm italian Franko Fratini tha se e priti me hidhërim dekretin rus
për pavarësinë e republikave separatiste të Gjeorgjisë. “Është një tjetër element
që i shtohet një situate të ndërlikuar qysh tani, tha Fratini. Është një njohje e
njëanëshme që nuk është e mbështetur nga kuadri ligjor ndërkombëtar, por që të detyron
të reflektosh mbi sigurinë në rajon, duke qenë të vetëdijshëm se stabiliteti, qëndrueshmëria
dhe paqja kërkojnë që të bashkëpunohet me Rusinë.” “Askush nuk ka interes që çështja
të ballkanizohet mbi baza etnike.” nënvizoi Fratini. Por njohja e Moskës ndihej
që dje, kur senati dhe duma e kishin miratuar njëzëri pavarësinë e dy zonave që janë
në qendër të konfliktit ndërmjet Tbilisit dhe Moskës. Ndërkaq shenja të humbjes
së drejtëpeshimit në marrëdhëniet Nato- Rusi po nxjerrin në skenë fantazmën e një
lufte të ftohtë të re. Ambasadori rus pranë Aleancës së Atlantikut Dimitri Rogozin,
lajmëroi shtyrjen e vizitës në Moskë të sekretarit të përgjithshëm të Nato-s Shefer.
Po ashtu një ngjarje e papritur u bë e njohur: ambasadori rus në Kabul, Zamir Kabulov,
kërcënoi se do të bllokojë kalimin e autokolonave të Nato-s që transportojnë ushqime
dhe pajisje në Afganistan, nëpër territorin rus. Por lajmi u përgënjeshtrua menjëherë
nga i dërguari i Moskës pranë Nato-s Dimitri Rogozin. Edhe kryetari i parlamentit
europian Hans-Gert Potering, pak ditë para mbledhjes së jashtëzakonshme të të 27-tëve
që do të mbahet në Bruksel me 1 shtator, foli ashpër për gjendjen e krijuar në Kaukaz.
“Fatkeqësisht Saakashvili bëri gabim kur sulmoi Osetinë e jugut, por Rusia bëri një
tjetër edhe më të madh duke sulmuar Gjeorgjinë, që është një vend sovran e i pavarur”
tha Potering në një intervistë dhënë gazetës “Corriere della Sera”. Nga ana tjetër
një anije luftarake e flotës amerikane ngarkuar me ndihma humanitare për Gjeorgjinë,
po drejtohet në Poti, qytet bregdetar në Detin e Zi. Zëdhënësi Stiv Gujs, saktësoi
se së bashku me një anije tjetër humanitare anija luftarake MekFaul do të mbrrijë
nesër në në portin gjeorgjian, ku aktualisht gjenden trupat ruse. “Me kërkesë të
qeverisë gjeorgjiane, anijet do të shpërndajnë ndihma humanitare në Poti”, tha Gujs.