Në Engjëllin e Tënzot Papa u bën thirrje kombeve: të shmanget rreziku i rikthimi
të kundërvënieve tragjike të së kaluarës.
(25.08.2008 RV)Dje, në lutjen e
Engjëllit të Tënzot, në Kastel Gandolfo, Papa shprehu shqetësimin e tij të thellë
për rritjen e tensioneve ndërkombëtare dhe u bëri një thirrje të fuqishme shteteve
për ta shmangur rikthimin e kundërvënieve tragjike të së kaluarës. Duhet thelluar
vetëdija se njerëzimi është një familje e vetme kombesh – theksoi me forcë Papa. Lidhur
me këtë pohim e duke kujtuar Ungjillin, që propozonte liturgjia e së dielës, Benedikti
XVI nënvizoi edhe se misioni i Pasardhësit të Pjetrit është pikërisht ta bashkojë,
në Krishtin, mbarë njerëzimin si një familje e vetme. Benedikti XVI theksoi me
keqardhje rrezikun e keqësimit, në vijim, të klimës së besimit e të bashkëpunimit
ndërmjet shteteve, të cilat duhej të ishin gjithnjë më të vetëdijshme se bëjnë pjesë
në ‘familjen e kombeve’, siç u shpreh Gjon Pali II para Asamblesë së Përgjithshme
të OKB-së. “Duhet thelluar vetëdija se na bashkon i njëjti fat, i cili në fund
të fundit është fat i mbinatyrshëm, (cfr Mesazh për Ditën Botërore të Paqes,
1 janar 2006, n.6) , për të shmangur rikthimin e kundërvënieve nacionalistike,
që patën pasoja aq tragjike në stinët e tjera historike. Ngjarjet e fundit kanë bërë
që shumkush ta shikojë me dyshim të ardhmen, duke mos besuar se një përvojë e tillë
i takon përfundimisht së kaluarës”. Megjithatë, nuk duhet të biem në pesimizëm,
vijoi Papa: “Përkundrazi, duhet të impenjohemi gjallërisht, që të shmanget tundimi
për t’i përballuar situatat e reja me sistemet e vjetra. Duhet hequr dorë nga dhuna!
Forca morale e së drejtës, bisedimet e ndershme e trasparente për t’i dhënë fund kundërvënieve,
duke nisur nga ata që kanë të bëjnë me lidhjen ndërmjet tërësisë tokësore e vetvendosjes
së popujve, mbajtja e fjalës së dhënë si dhe kërkimi i së mirës së përbashkët: ja
disa nga rrugët kryesore, që duhen ndjekur në mënyrë të guximshme e krijuese, për
të vendosur marrëdhënie të frytshme e të sinqerta e për t’u siguruar breznive të
sotme e të ardhshme kohë harmonie e progresi moral e qytetar”. Papa iu lut
Marisë,‘Mbretëreshës së paqes’ që udhëheqësit e kombeve të bëjnë çmos për rivendosjen
e paqes e të drejtësisë. Para kësaj thirrjeje, duke pasur parasysh Ungjillin e së
dielës, Benedikti XVI foli për misionin e Pasardhësit të Pjetrit, që është pikërisht
‘të bashkojë në Krishtin mbarë njerëzimin në një familje të vetme”: “Shërbimi
i tij i domosdoshëm është që Kisha të mos identifikohet kurrë me një komb të vetëm,
me një kulturë të vetme, por të jetë Kisha e mbarë popujve, për ta bërë të pranishme
ndërmjet njerëzve, të trazuar nga përçarje e kundërvënie të panumërta, paqen e Hyjit
dhe forcën përtëritëse të dashurisë së tij. Përballë përgjegjësisë së jashtëzakonshme
të kësaj detyre, e ndjej gjithnjë më shumë barrën e rëndë të shërbimit ndaj Kishës
e ndaj botës që ma besoi Zoti. Prandaj ju kërkoj ju, të dashur vëllezër e motra, të
më ndihmoni me lutjet tuaja që, besnikë ndaj Krishtit, ta kumtojmë e ta dëshmojmë
së bashku praninë e tij në kohën tonë”. Benedikti XVI kujtoi edhe besojmën
e Pjetrit, që e njeh Jezusin si ‘Krishtin, Birin e Hyjit të gjallë” dhe ripohoi me
forcë vetëdijen se Krishti është thesari i vërtetë, për të cilin ia vlen të flijosh
gjithçka: “Ai është mik që nuk të braktis kurrë, sepse i njeh dëshirat më të
fshehta të zemrës sonë. Jezusi është Biri i Hyjit të gjallë, Mesia i premtuar, që
erdhi në tokë për t’i dhuruar njerëzimit shëlbimin e për të shuar etjen për jetë e
për dashuri të çdo zemre njerëzore. Ç’ përfitim të madh do të kishte njerëzimi po
ta pranonte këtë kumt, që sjell me vete gëzimin e paqen!”. Në përfundim Papa,
duke përshëndetur shtegtarët spanjollë, kujtoi aksidentin tragjik të avionit, të mërkurën
e kaluar në aeroportin e Madridit dhe i siguroi se vijon të lutet për shpirtin e të
vdekurve e për shërimin e shpejtë të të plagosurve: “El Señor conceda fortaleza,
consuelo y esperanza a sus familias... Zoti u dhënë forcë, shpresë e
ngushëllim familjeve të tyre, të cilave dëshiroj t’u rikujtoj dashurinë e afërsinë
time shpirtërore. Zoti i bekoftë!”.