Dyzet vjet më parë, shtegtimi historik i Palit VI në Bogota; Papa i parë që shkeli
në Amerikën Latine
(22.08.2008 RV)Dyzet vjet më parë, më 22 gusht 1968, Pali VI niste, në Bogota
të Kolumbisë, një shtegtim historik për hapjen e Konferencës II të përgjithshme të
Episkopateve latino-amerikane e karaibike. Ishte Papa i parë që shkelte në trojet
e Amerikës Latine. "Hijos amadísimos de Colombia y de América... Bij
të shumëdashur të Kolumbisë e të Amerikës … një galdim i thellë e një emocion i fuqishëm
pushtojnë shpirtin tonë, duke parë se Provania na ruajti privilegjin të jemi Papa
i parë që arrin në këtë tokë tejet fisnike, në këtë kontinent të krishterë, ku në
një ditë misterioze – të paracaktuar nga planet shëlbuese të Hyjit – mbi majat andine
arriti lartësia e Kryqit e në shtigjet e lashta të kibkas, të indianëve maja, inkas,
aztekë e tupi-guaranies, nisi të dukej fytyra e Krishtit”. Me këto fjalë
Pali VI, dyzet vjet më parë, më 22 gusht 1968, përshëndeste Kishat e Kontinentit
amerikan, sapo kishte arritur në kryeqytetin e Kolumbisë, ku kishte shkuar për të
hapur punimet e Konferencës II Episkoplae latino-amerikane e karaibike. Ishte fillimi
i vazhdimësisë së gjesteve profetike e atërore, që do të përforcoheshin, më pas, edhe
nga Gjon Pali II e nga Benedikti XVI. Prania e Papës në Kontinentin amerikan qe
një përqafim me të gjithë popujt, me besimtarët e jo besimtarët, katolikët e jo katolikët,
e kështu mbetën në kujtesën e popujve të këtyre viseve këto ditë të paharrueshme. Para
se të nisej, Pali VI pati marrë një lajm tepër të trishtueshëm: atë të shkeljes së
Çekosllovakisë nga tanket sovjetike. Deshi ta anullonte këtë shtegtim historik, në
se do të ishte e nevojshme, për të lehtësuar situatën dramatike. Megjithatë, dhimbja
që e shtrëngonte zemrën e Papës e të mbarë botës, në sa shikonte sesi liria thërmohej
nën zinxhirët e hekurt të tankeve, nuk mundi ta errësojë gëzimin e kësaj vizite papnore:
mijëra kolumbianë vërshuan nëpër rrugë, për të parë e për të përshëndetur Pasardhësin
e Shën Pjetrit, që kaloi në Kontinetin e ri, tri ditë të ngarkuara me veprimtari,
ndërmjet të cilave, fjalimi i famshëm i përurimit së Konferencës së përgjithshme të
Episkopateve latinoamerikane e karaibike, që hapte shtigje të reja shpirtërore, baritore
e shoqërore.