На Сiцылii праваслаўныя i католiкi супольна адзначылi свята Унебаўзяцця Панны Марыi.
Таксама i некаторыя праваслаўныя Цэрквы адзначылi 15 жнiўня свята Унебаўзяцця Панны
Марыi. У гэты ж дзень, у Сiцылii, католiкi i праваслаўныя ўшанавалi iкону Багародзiцы
i Унебаўзяцце Мацi Божай у манастыры Грэцкай Праваслаўнай Царквы, якi знаходзiцца
непадалёк ад г.Мессiна. У атмасферы братэрства была адпраўлена Богаслужба, якой папярэднiчала
адпаведная канфярэнцыя i малiтоўнае чуванне. Сярод прысутных на лiтургii быў настаяцель
манастыра, архiмандрыт Нiлас Ватопедiнас, вiкарны архiепiскап для Сiцылii i Калабрыi,
Iтальянскай архiепархii, якая знаходзiцца пад юрысдыкцыяй Канстантынопальскага патрыярхату,
а таксама прадстаўнiкi Патрыярхатаў Чарнагорыi, Грэцыi, Румынii, Балгарыi i Iталii,
законнiкi i студэнты, што вучацца ў Калабрыi i Сiцылii. Згаданы манастыр Дабравешчання
быў заснаваны ў XI° стагоддзi. Ён знаходзiцца памiж Мессiнай i Катанiяй. У жнiўнi
2000 года ён быў перададзены пад апеку праваслаўнай епархii Iталii, пераасвячаны з
блаславенствам Сусветнага Патрыярха Барталамея I° i мiтрапалiта Iталii Геннадыяса.
Пры манастыры iснуе Iнстытут праваслаўных навук iмя “Св. Нiкiфара Пустэльнiка”, на
адкрыццi якога ў сакавiку 2001 года асабiста прысутнiчаў Канстантынопальскi Патрыярх
Барталамей I°. Адной з нагодаў адкрыцця гэтай навуковай установы было развiццё дыялогу
памiж праваслаўнымi i католiкамi ў Еўропе. Сучасны ўзрост лiку на Сiцылii эмiгрантаў
з Румынii, Балгарыi i iншых краiн Усходняй Еўропы аднаўляе старажытныя адносiны памiж
востравам i краiнамi хрысцiянскага Усходу ў галiнах духоўнасцi, культуры i мастацтва. У
свята Унебаўзяцця скончыўся спецыяльны курс лекцый праваслаўнай духоўнасцi, якiм кiраваў
на працягу пяцi гадоў праф. Iван Iваноў, Патрыяршы дыякан Сафiйскай катэдры i выкладчык
тэалагiчнага факультэта Сафiйскага унiверсiтэта. Цяпер плануецца арганiзаваць
пры згаданым вышей манастыры першы курс iконаграфii, якi будуць праводзiць балгарскiя
навукоўцы Стэфан Стэфанаў i Люба Стэфанава.