(21.08.2008 RV)Sot, në emisionin
tonë të tetëmbëdhjetë të ciklit radiofonik “Me Nënë Terezën”, bazuar tek libri
‘Jeta ime’, e Lumja e parë shqiptare na tregon një ngjarje që dëshmon se dashuria
e pastërt e frymëzon njeriun të kryejë vepra heroike. Po ku mund të gjindet një dashuri
e tillë? Të dëgjojmë Nënë Terezën:
“Një herë një burrë erdhi në shtëpinë
tonë e më tha: ‘Këtu pranë jeton një familje induiste me tetë fëmijë, të
cilët ka ditë që nuk vënë gjë prej gjëje në gojë’. Si e dëgjova këtë, mora
pak oriz e dola me vrap që t’u jepja menjëherë diçka për të ngrënë. Hyra
pa trokitur, sepse porta ishte e hapur. Tetë palë sy u ngulën tek ena që
mbaja në dorë. Tetë palë gojë të vogla u hapën, ndërsa në tetë fytyrat e
njoma lexohej qartë vuajtja që shkakton uria. Ia dorëzova orizin nënës.
Ajo, për çudinë time, e ndau në dy pjesë të barabarta, e mori njërën e doli menjëherë
nga shtëpia. Kur u kthye, e pyeta: ’Ku ishe? Ç’e bëre orizin?’. Përgjigja
e saj ishte tepër e shkurtër: ‘Edhe ata kanë uri!’. Po kush ishin
‘ata’ – ‘të tjerët’? Një familje myslimane, që jetonte aty pranë e që kishte
po aq fëmijë. Kjo grua e dinte se edhe ata kishin uri. Ajo që
më preku deri në thellësi të zemrës, ishte pikërisht fakti se ‘ajo e dinte’, e me
që e dinte, u bë bujare deri në heroizëm: ua hoqi orizin nga goja fëmijëve të saj,
për t’ua dhuruar fëmijëve të tjerë, sepse ‘e dinte’ që edhe ata kishin uri! Ç’mrekulli! Kjo
është dashuri e pastërt, njerëzore, e vërtetë, që nuk e takojmë kudo. Kjo
grua dhuroi me dhimbje. Por nuk ngurroi të dhuronte. Atë natë nuk u ktheva
për t’u çuar përsëri oriz. Desha ta provonin me fund gëzimin që ndjen kur jep, ku
ndan me tjetrin edhe kafshatën e fundit. Veç t’i shikoje fytyrat e vocrrakëve,
si ndriçonin nga ky gëzim i papërshkrueshëm. Ata, po, e kishin kuptuar
fare mirë ç’ kish bërë e ëma. Kur pata hyrë, fytyrat e tyre ishin të trishtuara,
me shenjat e dukshme të urisë, por gjesti i nënës u dha mësimin më të çmuar, që s’mund
ta japë asnjë shkollë: u mësoi ç’do të thotë dashuri e vërtetë!”.