Me Nënë Terezën : “Më në fund, ngrohtësia e një dore”.
(18.08.2008 RV)“Më në fund, ngohtësia
e një dore…!” - titullohet emisioni ynë i pesëmbëdhjetë i ciklit radiofonik “Me
Nënë Terezën”, që bazohet tek libri ‘Jeta ime’.
“Në Melburn
kemi një shtëpi për njerëzit e alkoolizuar. Të alkoolizuar e të braktisur. Një
ditë njerin prej tyre e rrahu për vdekje një shok mjerimi. Duhej thirrur
policia. Kështu edhe bëmë e kur arritën policët, nisën ta pyesin të plagosurin. “Kush
t’i shkaktoi këto plagë?”. Njeriu i plagosur trilloi gjithfarë gënjeshtrash,
duke treguar qartë se nuk e kishte fare ndër mend të rrëfente të vërtetën, domethënë,
emrin e njeriut që e kishte rrahur”. Policët u nisën e shkuan pa zbuluar
asgjë. Atëherë e pyeta: “A mund ta dimë pse nuk i tregove policëve
kush t’i shkaktoi plagët?”. Ai më pa drejt në sy e më tha: “Se
mos do të më ishte lehtësuar dhimbja, në se ai do të dënohej”. Kishte heshtur,
sepse nuk donte të vuante edhe ai që e kishte plagosur. Sa e madhe dhe e
bukur është dashuria e njerëzve tanë. Kjo është një mrekulli e vërtetë,
që e shikojmë çdo ditë ndërmjet të varfërve. I quajmë të varfër, po në të
vërtetë janë shumë më të pasur se ne me dashuri. Një ditë, duke ecur në
rrugët e një qytetit të madh evropian, u shkapeta me një burrë të bërë tapë. Kishte
një pamje tepër të trishtuar. E pashë në sy e, si ia mora dorën në dorën
time, e pyeta: “Si e ndjeni veten? (kujtoj se duart e mia janë gjithnjë
të nxehta). E ai: “Ohhh! Më në fund, pas kaq vjetësh, po provoj
për herë të parë ngrohtësinë e një dore njerëzore”. E fytyra e tij u mbush
me dritë. Buzëqeshi i lumtur. Me këtë desha të them se nganjëherë vetëm
disa gjeste fare të vogla, të bëra me shumë dashuri, i japin tjetrit paqe e gëzim. Njerëzit
mund të jenë të bardhë, të verdhë a të zinj, të rinj a pleq, të pasur a të varfër.
Por ju siguroj se të gjithë janë të njëllojtë. E që të gjithë
kanë shumë, shumë nevojë për një dorë të ngrohtë në orën e provës".