Papa në Meshën e të Ngjiturit të Zojës në qiell: “Ashtu si Maria, të krishterët duhet
të jenë shenjë shprese e ngushëllimi në botë".
(15.08.2008 RV)Përballë shfaqjes
së trishtuar të gjithë këtij gëzimi të rremë e njëkohësisht të gjithë kësaj dhimbjeje
plot ankth, që vërshon mbi botën, duhet të mësojmë nga Virgjëra Mari për t’u bërë
shenja shprese e ngushëllimi e për ta kumtuar, me jetën tonë, ngjalljen e Krishtit!
Me këto fjalë e përfundoi Benedikti XVI homelinë e Meshës Shenjte, kryesuar sot paradite
në famullinë e Shën Tomës nga Vilanova, në Kastel Gandolfo, në Solemnitetin e të Ngjiturit
të Zojës në Qiell. Festa e sotme – tha Papa - na nxit të ngjitemi bashkë me Marinë
në lartësitë e Shpirtit Shenjt, ku thithet ajri i pastër i jetës së mbinatyrshme e
kundrohet bukuria më e vërtetë, që është shenjtëria. Të ngjiturit e Marisë me korp
e me shpirt në qiell – kujtoi Ati i Shenjtë – është ngjarje e pashembullt dhe e jashtëzakonshme,
që e mbush me shpresë e me lumturi zemrën e çdo njeriu. Kështu Zoja e Bekuar bëhet
shenjë shprese e ngushëllimi: “Kjo festë na nxit t’i lartojmë sytë drejt qiellit;
një qielli që nuk është i bërë nga ide abstrakte, e as një qielli imagjinar, krijuar
nga arti, por qiellit të realitetit të vërtetë të Hyjit. Hyji është qielli, Hyji është
caku nga vijmë e ku dëshirojmë të shkojmë”. Kur Maria ra në gjumë në këtë
botë, për t’u zgjuar në qiell – shpjegoi Papa – s’bëri tjetër, veçse ndoqi për herë
të fundit Birin e vet, Jezusin, në shtegtimin e tij më të gjatë e përfundimtar: “Si
Ai, e së bashku me Të, u nis nga kjo botë, për t’u kthyer në shtëpinë e Atit. E gjithë
kjo nuk është larg nga ne, siç duket në çastin e parë, sepse të gjithë jemi bij të
Hyjit, të gjithë jemi vëllezër të Jezusit e të gjithë jemi edhe bij të Marisë, Nënës
sonë. E të gjithë priremi drejt lumturisë. E lumturia, që të gjithë e dëshirojmë,
është Hyji, kështu të gjithë jemi në shtegtim drejt kësaj lumturie, të cilën e quajmë
qiell e që është Hyji”. I lutem Marisë – vijoi Ati i Shenjtë – të na ndihmojë
që çdo hap i jetës sonë të jetë një hap para në shtegtimim drejt Hyjit, drejt këtij
shndërrimi që ka të bëjë me çdo njeri e me mbarë gjithësinë: “Ajo, nga e cila
Zoti u mishërua, me shpirtin e shporuar nga shpata mbi Kalvar, qe e para që provoi
misterin e këtij shndërrimi, drejt të cilit shkojmë të gjithë, edhe ne shpesh herë
të shporuar nga shpatat e vuajtjeve të kësaj bote. Eva e re ndoqi pas Adamin e ri
në vuajtje, në mundime e edhe në gëzimin përfundimtar. Krishti është fryti i parë,
por korpi i tij i ngjallur nuk mund të ndahet nga ai i Nënës së Tij tokësore, Marisë,
e në Të, gjithë njerëzimi përfshihet në Ngjitjen drejt Hyjit”. Është një shndërrim
në të cilin përfshihet mbarë gjithësia, sepse do të lindë një qiell i ri e një tokë
e re, në të cilën nuk do të ketë më lot, as vaj e as vdekje. “Ç’mister i madh
dashurie na ripropozohet sot për kundrim! Krishti fitoi mbi vdekjen me gjithëpushtetin
e dashurisë. Vetëm dashuria është e gjithëpushtetshme e të bën të hysh në mbretërinë
e jetës. Maria hyri atje pas të Birit, e shoqëruar nga lumnia e Saj, pasi qe shporuar
nga mundimet, duke lënë pas udhën e hapur për të gjithë ne. E prandaj sot e quajmë
‘Porta e qiellit’, ‘Mbretëresha e Engjëjve’ e ‘Streha e mëkatnorëve’. Sigurisht nuk
janë gjykimet – tha Papa – që na bëjnë t’i kuptojmë këto realite tejet të larta,
por feja e thjeshtë, e kulluar dhe heshtja e lutjes, që është shumë më e fuqishme
se ne vetë e që na ndihmon të flasim drejtpëdrejtë me Zotin”. T’i lutemi Marisë
– ftoi Ati i Shenjtë – të na japë dhuratën e fesë, asaj feje që të bën të jetosh që
tani në përmasën ndërmjet sosjes së jetës e jetës së pasosur, asaj feje që shndërron
edhe ndjenjën e kohës: “Duke parë Zojën e Ngjitur në Qiell, e kuptojmë më mirë
se jeta jonë e përditshme, ndonëse plot me prova e vështirësi, rrjedh si lumë drejt
oqeanit hyjnor, drejt gëzimit e paqes së përkryer. Kuptojmë se vdekja jonë nuk është
fundi, por hyrja në jetën që nuk njeh mort. Perëndimi ynë në horizontin e kësaj bote,
është agim në botën e re, në ditën e amshuar”. Në përfundim Ati i Shenjtë iu
lut Marisë të na shoqërojë në mundimin e jetës sonë të përditshme e të vdekjes sonë,
duke na ndihmuar të drejtohemi gjithnjë drejt atdheut të lumnive. “Përballë
shfaqjes së trishtuar të gjithë këtij gëzimi të rremë e njëkohësisht, të gjithë kësaj
dhimbjeje të ankthshme, që vërshon mbi botën, duhet të mësojmë nga Virgjëra Mari për
t’u bërë shenjë shprese e ngushëllimi e për ta kumtuar me jetën tonë, ngjalljen e
Krishtit”.
Më pas, në lutjen e Engjëllit të Tënzot,
Papa kujtoi se “ nga Parajsa, Zoja e Bekuar vijon t’i ndihmojë bijtë, që ia besoi
Jezusi, para se të vdiste në kryq, posaçërisht në çastet e vështira të provës: “Sa
dëshmi të kësaj mbrojtjeje amtare vërtetohen duke vizituar Shenjtëroret që i kushtohen
Asaj! Mendoj këtë çast posaçërisht për qytezën e veçantë botërore të jetës e të shpresës,
për Lurdën ku, në dashtë Zoti, do të shkoj pas një muaji, për të kremtuar 150- vjetorin
e dukjeve mariane që ndodhen këtu”. Zoja e ngjitur në qiell – tha në përfundim
Papa – na tregon cakun e fundit të shtegtimit tonë tokësor: “Na kujton se gjithë
qenia jonë – shpirt e korp – është e paracaktuar për jetën e vërtetë; se kush jeton
e vdes duke dashur Zotin e të afërmin, do të shndërrohet sipas shembëlltyrës së trupit
të lumnuar të Krishtit të ngjallur; se Zoti i përul krenarët e i larton të përvujtit
(cfr Lk. 1, 51-52). Këtë Zoja e Bekuar e shpall në amshim me misterin
e të Ngjiturit të saj në Qiell. Qofsh e lavdëruar përgjithmonë e jetës, o Virgjëra
Mari. Lute Zotin për ne!”.