Kolumbi: mbytet me thikë një famullitar i Medelinit.
(15.08.2008 RV)Ishte 70 vjeç e ia kishte kushtuar gjithë jetën të varfërve
dom Xhejm Osa Toro, meshtari katolik i therur me thikë në Medelin, në veri-lindje
të Kolumbisë. “Shquhej për shpirtin e dashurisë së krishterë ndaj të varfërve,
për sinqeritetin, zgjuarësinë e kulturën, prandaj besimtarët e donin shumë” – pohon
kryeipeshkvi i Medelinit, imzot Alberto Gjiraldo Jaramilo, i prekur thellë nga vdekja
e misionarit, që erdhi këtu pas 14 vjetësh shërbimi në Angola. Nuk ka ende lajme
të sakta për hollësitë e krimit e për shkaqet e tij. Dihet vetëm se trupi i meshtarit
katolik saverian, i goditur disa herë me thikë, u gjet dje në banesën e tij, pranë
Kishës së Emaus, ku shërbente prej tri vjetësh si famullitar. Deri tani dyshimet bien
mbi një djalosh 16 vjeçar, që është parë pranë famullisë në orën e krimit.