Nunci Apostolik Imzot Menini: plani i paqes mes Rusisë e Gjeorgjisë, një hap para
(13.08.2008 RV)Lidhemi me telefon me përfaqësuesin e Selisë së Shenjtë në Federatën
Ruse, kryeipeshkvi Antonio Menini cili përgjigjet, nga Moska, në mikrofonin
e Radio Vatikanit: Pyetje: -
Cilat janë aspektet për t’u nënvizuar në planin e paqes, propozuar nga
Evropa?
Përgjigje: - Plani i paqes
është një hap shumë domethënës përpara, sepse të dyja palët u morën vesh për dokumentin
e hartuar bashkërisht nga presidenti Sarkozi dhe presidenti Medvediev. Ndërmjet gjashtë
pikave, posaçërisht ajo që ka të bëjë me mospërdorimin e forcës, do të krijojë kushtet
edhe për hyrjen e ndihmave humanitare, në mënyrë të qëndrueshme e afatgjatë. Pala
gjeorgjane nguli këmbë të mos vihet fare në diskutim, për të ardhmen, statusi juridik
i dy zonave separatiste; gjithsesi, në këtë çast, ky është problem i dorës së dytë.
Ajo që ka rëndësi, është të heshtin armët e palët të ulen rreth tryezës sëbisedimeve.
Pyetje: - Mund
të themi se në frontin ushtrak të konfliktit fitoi Rusia, ndërsa në atë diplomatik,
Bashkimi Evropian, që propozoi planin e paqes, të pranuar nga Moska e, pjesërisht,
edhe nga Tbilizi; në këtë rast zëri i Brukselit u dëgjua…
Përgjigje:
- Po, situata dëshmoi se përballë një farë heshtjeje të fuqive të tjera
– pa dashur t’i përmend - Bashkimi Evropian mund të luajë një rol të rëndësishëm.
Rol që, them se u pranua edhe nga Rusia.
Pyetje:
- Shkelqësi, sipas jush konflikti që shpërtheu në Osecia mund të konsiderohet
edhe si pasojë e drejtpëdrejtë e pavarësisë së njëanëshme të Kosovës?
Përgjigje:
- E ceku dje presidenti Medvedjev. Por nuk besoj, siç thuhet, se Rusia
dëshiron të luajë kartën e pavarësisë së dy republikave, sepse një gjë e tillë do
të krijonte probleme jo vetëm në pjesët e tjera të botës, por edhe brenda Federatës
Ruse.
Pyetje: - Cilat drejtpeshime
duhen mbrojtur për të siguruar ardhmërinë e zonës kaukazike? Përgjigje:
- Dua të huaj disa fjalë, shkruar dje në Uashington Post nga ish-presidenit
i Bashkimit Sovjetik, Mikail Gorbaçiov. Ish – kryetari i shtetit pohon se sigurisht,
kur SHBA pohojnë se Kaukazi është një sferë influence jetike për interesat e tyre
kombëtare, kjo pjesërisht është e vërtetë. Është e vërtetë për faktin se paqja në
Kaukaz nuk mund të mos jetë në interes të të gjithëve; por – shton Gorbaçiovi – duhet
pasur parasysh se Rusia, me më shumë arsye, ka interesa të ligjshme në zonë, interesa
që rjedhin nga një histori e gjatë e përbashkët e këtyre popujve e, pastaj, edhe nga
pozicioni gjeografik.
Pyetje: - Cili
është kontributi që mund të japë Kisha për ruajtjen e paqes?
Përgjigje:
- Mendoj se pikërisht, ashtu siç ka thënë Ati i Shenjtë, i cili bëri thirrje
duke kujtuar rrënjët e përbashkëta të krishtera të popujve, para së gjithash duhet
një aksion edukativ: duhet zhdukur ndjenja e dyshimit për gjithçka është e ndryshme
në këndvështrimin kombëtar. Pastaj, së bashku edhe me katolikët, duhet promovuar veprimtaria
humanitare. E di se drejtuesit tanë të Karitasit rus janë tashmë në vend e po verifikojnë,
së bashku me drejtuesit e Kishës ortodokse, si t’i shpërndajnë ndihmat edhe nga pala
katolike.