Papa në lutjen e Engjëllit të Tënzot reflektoi mbi rreziqet e zbraztësisë shpirtërore,
që krijojnë disa aspekte të shoqërisë së mirëqenies.
(11.08.2008 RV)Gjatë lutjes së djeshme të Engjëllit të Tënzot, duke folur në
fillim në gjuhën gjermane, Ati i Shenjtë nënvizoi kënaqësinë e ditëve të pushimit,
për të kujtuar, më pas, Ungjillin e djeshëm, që i çoi besimtarët nga vendi i pushimit,
në jetën e përditshme. Tregon Ungjilli – shpjegoi Papa – sesi pas shumëzimit të bukëve,
Zoti ngjitet në mal për të ndenjur vetëm me Atin. Ndërkaq nxënësit janë në liqen e,
me barkën e tyre të vjetër, lodhen më kot për të përballuar erën e kundërt. Edhe sot
– vijoi Benedikti XVI – në shumë vise të tokës, Kisha përpiqet të përparojë, pavarësisht
nga era e kundërt, e duket sikur Zoti është tepër larg, por Ungjilli na jep përgjigje,
ngushëllim e zemër. Njëkohësisht na tregon edhe udhën. Krishti na shtrin dorën, ashtu
si nxënësve, e vetëm në se ne e shtrëngojmë atë dorë dhe e lemë të na prijë – shtoi
Benedikti XVI – udha jonë është e drejtë dhe e mirë. Për këtë duam të lutemi – pohoi
Papa – që ta shtrëngojmë gjithnjë dorën e Tij e, më pas, t’ia shtrijmë edhe ne dorën
atyre që kanë nevojë, për t’i udhëhequr në ujërat e historisë sonë. Papa e vijoi
reflektimin në gjuhën italiane, duke u drejtuar një ftesë të fuqishme e të përzemërt
të rinjve, që të mos e ngatërrojnë gëzimin e vërtetë, me mirazhet e rreme të kënaqësisë.
Benedikti XVI kujtoi fytyrat gazmore të shumë djemve e vajzave nga të katër anët e
botës, takuar në Sidnei, të cilët provuan gëzimin e vërtetë të zbulimit, së bashku,
të një bote të re, pa pasur nevojë të sillen në mënyrë të pahijshme e të dhunshme,
të përdorin alkool e drogë. Papa e nënvizoi këtë, duke menduar me dhimbje, bashkëmoshatarët
e tyre, që bien në hendekun e arratisjeve të rreme nga realiteti, jetojnë përvoja
zvetënuese e, jo radhë, bëhen viktima të tragjedive, që mund të shmangeshin. Benedikti
XVI analizoi edhe shkaqet: “Ky është prodhim tipik i së ashtuquajturës ‘shoqëria
aktuale e mirëqenies” e cila, për të mbushur zbraztësinë shpirtërore e mërzinë, që
e shoqëron, të nxit të provosh përvoja të reja, më emocionuese, më ekstreme”. Edhe
pushimet – kujtoi Papa – krijojnë kështu rrezikun të shndërrohen në mirazhe të kënaqësisë.
Por në këtë mënyrë – vërejti Ati i Shenjtë – shpirti nuk pushon, zemra nuk provon
gëzim e nuk gjen paqe, përkundrazi, lodhet e trishtohet edhe më shumë se përpara.
Papa shpjegoi edhe se nuk po u fliste vetëm të rinjve: “Përmenda të rinjtë,
sepse janë më të etur për jetë e për përvoja të reja, e prandaj edhe rrezikohen më
shumë. Por reflektimi vlen për të gjithë: njeriu rilindet vërtetë vetëm në lidhje
me Hyjin, e Hyjin mund ta takojë vetëm duke e dëgjuar zërin e Tij në qetësinë shpirtërore
e në heshtje”. Papa uroi që në një shoqëri, që vijon të vrapojë gjithë ditën,
pushimet të jenë çaste të vërteta prehjeje.