Diplomacia ndërkombëtare në punë për të ndalur luftën e hapur ndërmjet Gjeorgjisë
e Rusisë e zgjidhur krizën e Osetisë së Jugut.
(11.08.2008 RV)Papa Benedikti XVI, Bashkësia ndërkombëtare, Bashkimi Evropjan,
SHBA-së e Kina kërkojnë ndalimin e menjëhershme të luftimeve, që ka shkaktuar kriza
në Osetinë e Jugut e që rrezikon të përhapet edhe në provincën tjetër gjeorgjiane
të Abkhazisë. Një thirrje të fuqishme Papa Benedikti XVI i ka bërë Rusisë
e Gjeorgjisë për braktisjen e armëve dhe rimarrjen e dialogut mbi krizën në Oseti
të jugut. Edhe bashkësia ndërkombëtare, sidomos SHBA-së e Bashkimi Evropjan, i kanë
kërkuar Rusisë e Gjeorgjisë të ndërmarrin rrugën e negociatave. Ndërkaq në terren
gjendja është e tmerrshme: të vdekur, të plagosur e ndërtesa të shkatërruara në Tbilisi
e zona tjera. Kështu rrëfejnë ata që kanë qenë dëshmitarë të asaj që ka ndodhur këtyre
ditëve në Gjeorgji. E “armë-pushimi” i lajmëruar e disa herë i përngënjeshtruar, nuk
premton asgjë të mirë. Gjendja mbetët jashtëzakonisht e tensionuar, e si pasojë e
luftimeve që vazhdojnë në terren, është krijuar edhe problemi humanitar, me mijëra
e mijëra civilë që kanë braktisur shtëpitë dhe qytetët e tyre për t’i ikur luftimeve
dhe bombardimeve ruse të denoncuara nga Tbilisi. Presidenti i Gjeorgjisë, Mikhail
Sakashvili, ka deklaruar se “është dakord me planin e paraqitur nga Bashkimi Evropjan”
për t’i dhënë fund konfliktit, por nënshkrimit gjeorgjian dhënë ministrit të Jashtëm
francezë, Bernard Kushner në Tbilisi gjatë misionit ndërmjetësues së bashku me homologun
finlandezë, Aleksander Stubb, i mungon ende nënshkrimi tjetër, ai i Moskës, ku Kushner
ka shkuar sot pasdite për ti kërkuar autoriteteve ruse ndaljen e sulmeve ushtarake
dhe tërheqjen e trupave nga territori i Gjeorgjisë e për të zgjidhur kështu konfliktin
përmes dialogut. Presidenti Amerikan Bush duke dënuar aksionin ushtarak rus e ka
përcaktuar sot të “papranueshme” dhunën në Gjeorgji nga ana e Rusisë. “Kam thënë se
kjo dhunë është e papranueshme, e nuk i kam thënë vetëm Vladimir Putinit, por ia kam
thënë edhe presidentit të vendit, Dimitri Medvedev”, ka deklaruar Bush në një intervist
dhënë rrjetit televiziv Nbc. Bush ka bërë thirrje për ndërmjetësim ndërkombëtar për
zgjidhjen e mospajtimeve lidhur me rajonin separatist, Osetia Jugore, në Gjeorgji
dhe ka kërkuar gjithashtu që trupat e të gjitha palëve të kthehen atje ku ishin para
se të shpërthenin armiqësitë më datë 6 të këtij muaji. Mbështetja politike e drej
dy ditësh edhe ajo e armatosur e Rusisë ndaj separatistëve të Osetisë së Jugut rrezikon
të ndez rajonin e Kaukazit, që është një mozaik etnik e fetar.