НАВУЧАЛЬНЫ ГОД:Папскi Урбанiянскi унiверсiтэт i каталіцкая Фундацыя “Мiсна” cтварылі
майстар-клас па падрыхтоўцы прафесіяналаў СМI.Спадзяемся, што будуць у Рыме студэнты
і з Беларусі, дык урэшце зможам мець і ў нашай рэдакцыі практыкантаў - нам на дапамогу
і слухачам на радасць.
Заняткi пачнуцца ў лiстападзе 2008 года, а скончацца ў снежнi 2009 года. Зазначым,
што ў Італіі да нядаўняга часу не існавала факультэтаў журналістыкі, а толькі так
званыя "сацыяльныя камунікацыі". Для выпускнікоў з рознымі спецыялізацыямі ў галіне
тэалёгіі, філасофіі, мастацтвазнаўства і будуць адцяпер праводзiць майстар-класы ў
славутым "Грыгарыянуме", дзе на ф-тах тэалёгіі і мастацтвазнаўства ўжо правучылася
за апошнія 10 год з некалькі соцень выхадцаў з СНГ і Беларусі таксама. Новы "Майстар"
дае першы ўзровень ў галiне СМІ ў культурным ды мiсiянарскiм кантэкстах. Курс навучання
мае на мэце падрыхтоўку спецыялiстаў для ўсяго света, праходзiць яго будуць маладыя
законнiкi i законнiцы, а таксама свецкiя вернiкi, якiя збiраюцца прысвяцiць сябе мiсiянарскай
дзейнасцi, праблемам супольнага iснавання розных культур i межрылiгiйнаму дыялогу.
Падчас навучання слухачы набудуць тэарытычныя, этычныя, сацыяльна-антрапалагiчныя
i iншыя веды, у тым лiку, лепей пазнаёмяцца з дзейнасцю Царквы. У той жа час, арганiзатары
майстар-класа прадставяць навучэнцам магчымасць атрымання практычных ведаў у галiне
логiкi вытворчасцi, заснаванне i эканамiчных магчымасцей выдавання перыёдыкі, радыё
i тэлебачання у разнастайным культурным і нацыянальным асяроддзi. Майстар-клас разлiчаны
на трынаццаць месяцаў. Курс складаецца з 432 гадзiн лекцый i семiнараў i 84 гадзiн
лабараторных працаў. У першай частцы курса будуць праводзiцца агульныя базавыя
лекцыi, а потым кожны студэнт будзе мець магчымасць абраць уласны сектар спецыялiзацыi:
друк i арганiзацыя працы перыядычных выданняў цi агенстваў; тэлеаўдыё-камунiкацыйныя
сродкi; супрацоўнiк i журналiст на радыё, ТБ i ў iнтэрнэте. У летнiя i восеньскiя
месяцы 2009 года студэнты пройдуць 100-гадзiнную практыку пры розных італьянскіх і
ватыканскіх СМI, якiя супрацоўнiчаюць з мастер-класам. На прыканцы курса яго навучэнцы
павiнны прадставiць адпаведную навуковую працу цi нейкi гатовы матэрыял iнфармацыйнага
характара, надрукаваны, альбо ў аудыё цi вiдэа выглядзе.