Një javë me Benediktin XVI, i cili nesër nga Bresanone kthehet në Kastel Gandolfo.
(10.08.2008 RV)Sot Papa e kremtoi përsëri lutjen e Engjëllit të Tënzot nga
Sheshi i Katedrales së Bresanones, ku para lutjes mariane, ipeshkvi i Bolxano-Besanones,
imzot Vilhelm Eger, kryesoi Meshën Shenjte, në praninë e mijëra besimtarëve. Është
lutja e dytë dhe e fundit e Engjëllit të Tënzot e kremtuar në Bresanone. Nesër Papa
do të largohet nga vendpushimi i sivjetëm, drejt Bolxanos, prej nga do të niset me
avion për në Romë e më pas, për në Kastel Gandolfo, ku do të kalojë pjesën tjetër
të stinës së nxehtë. Dje, një ditë para se të nisej, pranë Seminarit, ku
kaloi periudhën e pushimeve, Atit të Shenjtë iu dorëzua titulli ‘Qytetar Nderi’ i
Bresanones me motivacionin e dyfishtë: “Për lidhjet e ngushta që Benedikti XVI ka
me Bresanonen, qytet ku kaloi disa herë pushimet e në të cilin u rikthye si Papë”
si dhe “për impenjimin e Atit të Shenjtë në nxitjen e dialogut ndërmjet feve”. Dorëzimi
i qytetarisë së nderit Benediktit XVI vulosi edhe vëllazërimin ndërmjet Bresanones
e Regensburgut, në universitetin e të cilit Papa ka qenë profesor i dogmatikës, i
historisë së dogmave dhe zevendës-drejtor. Të premten e kaluar në Pekin u
hapën Lojërat XXIX Olimpike të epokës moderne. Autoritetet kineze i lejuan meshtarët
e huaj të kremtojnë meshë në dy kishat e kryeqytetit; liturgjitë do të vijojnë çdo
të diele, deri më 20 shtator, në katedralen e Dongtanit, në qendër të Pekinit, dhe
në atë të Bei Tan. E ndërkaq të martën e kaluar mendimi i Bendiktit XVI,
shkoi përsëri në Kinë në sa, gjatë vizitës në Val Badia, nderoi kujtimin e një biri
të shquar të kësaj toke: Shën Jozefin Frainademec, misionar në Kinë, në shekullin
XX. T’i dëgjojmë fjalët e Papës: “Një Shenjt jashtëzakonisht aktual: e dimë
se Kina bëhet gjithnjë më e rëndësishme në jetën politike, ekonomike e edhe në jetën
e ideve. Ka shumë rëndësi që ky vend t’ia hapë portat Ungjillit!”. E më pas: “Shën
Jozefi Frainademec na dëshmon se feja nuk është tjetërsim për asnjë kulturë, për asnjë
popull, sepse të gjitha kulturat e presin Krishtin, që nuk i shkatërron: përkundrazi,
me Të arrijnë pjekurinë e tyre të plotë”. Kujtojmë edhe se të dielën e kaluar,
në lutjen e Engjëllit të Tënzot, Benedikti XVI përshëndeti sportistët, që marrin pjesë
në Olimpiadën e Pekinit, duke u uruar të arrijnë rezultatet e dëshiruara, në frymën
e vërtetë të garave olimpike: “E ndjek me simpati të thellë këtë takim të
madh sportiv – më i rëndësishmi e më i prituri në nivel botëror – e uroj që t’i japë
bashkësisë ndërkombëtare një shembull me vlerë të bashkëjetesës ndërmjet njerëzve
me prejardhje të ndryshme, që respektojnë dinjitetin e përbashkët. Uroj edhe një herë
që sporti të jetë peng vëllazërimi e paqeje ndërmjet popujve”. Por të rikthehemi
përsëri pas në kohë, duke kujtuar të mërkurën e kaluar, kur Papa mori pjesë
në takimin e gëzueshëm me meshtarët e diakonët në Katedralen e Bresanones. Pas përshëndetjes
së ipeshkvit të Bolxano-Bresanones, imzot Vilhelm Eger, disa meshtarë i drejtuan pyetje
Atit të Shenjtë. U prekën një mori temash me interes për jetën e Kishës e të botës.
Salla e Shtypit e Selisë së Shenjtë e botoi tekstin e plotë të këtij dialogu.Ndërkaq
Ati i Shenjtë përgatitet shpirtërisht për shtegtimet e ardhshme, që fillojnë në
në muajin shtator: më parë në Kaliari e pastaj në Paris e në Lurdë. Më pas do
të jetë sinodi i ipeshkvijve për të cilin, natyrisht, Papa ka filluar të përgatitet.
Më 4 tetorin e ardhshëm, festa e Shën Françeskut të Asizit, Benedikti XVI do të
shkojë në Kuirinale, për t’i kthyer presidentit të Republikës së Italisë, Gjorgjio
Napolitano, vizitën që i bëri në Vatikan më 20 nëntor 2006. Pas vizitës në Kuirinale,
programuar për datën 4 tetor, Benedikti XVI do të bëjë edhe një vizitë tjetër. Do
të shkojë në Shenjtëroren e njohur mariane të Pompeit, pranë Napolit, ku do të kremtojë
Meshën Shenjte dhe do të thotë lutjen drejtuar Virgjërës Mari, shkruar nga Bartolomeo
Longo. Ati i Shenjtë do t’ia besojë ndërmjetësimit të Zojës reflektimet dhe përfundimet
e Sinodit të Ipeshkvijve, që do të mbahet gjatë muajit tetor në Vatikan. Veç kësaj,
Benedikti XVI do t’ua porosisë ipeshkvijve të mbarë Kishës familjet e gjithë botës
e do t’i lutet Nënës së Krishtit, së bashku me Kishën, që është në Pompei e me miliona
besimtarët, që thonë Rruzaren Shenjte, për unitetin e familjeve, besnikërinë ndërmjet
bashkëshortëve, guximin për t’i edukuar fëmijët në fe.