(08.08.2008 RV)Takimi në Katedrale me meshtarët, seminaristët dhe bashkësinë
e fakultetit teologjik dhe një takim tjetër në Bazilikën e Bonarias me njëqindvjeçarët
sardë, janë të rejat që shtohen në programin e vizitës së Papës në Kaliari, më 7 shtator,
për të cilat foli dje kryeipeshkvi i qytetit sard, imzot Xhuzepe Mani. Prelati paraqiti
edhe programin e manifestimeve, që do t’i paraprijnë arritjes së Papës. Është një
kalendar shumë i pasur me nisma, që do të fillojnë një ditë para Festës së të Ngjiturit
të Zojës së Bekuar në qiell, kur në muzeun e Katedrales do të hapet ekspozita ‘Veshjet
e Shën Agostinit’. Do të hapet edhe një eskpozitë ikonografike kushtuar Shën Pjetrit,
një ekspozitë lëvizëse në Muzeun arkelogjik sard mbi zanafillën e krishterimit në
Ishull dhe një përmbledhje ikonash kushtuar Shën Luçiferit, ipeshkëv i Kaliarit në
shekullin III. Çasti më solemn do të jetë ai, kur Benedikti XVI do të vendosë
në duart e shtatores së Zojës së Bonarias, një barkë të vogël, simbol i fesë së sardëve.Duke
filluar nga lutjet e para mbrëmësore të datës 14 gusht, Kaliari do ta jetojë vigjiljen
e vizitës së Papës nën shenjën e artit, të kulturës e sidomos, të lutjes. Konfirmohen
të gjitha hollësirat e vizitës së Benediktit XVI më 7 shtator: Ati i Shenjtë do të
arrijë në Ishull rreth orës 9. 30. Një orë më pas do të kremtojë Meshën në tremen
e Bazilikës së Bonarias. Pas drekës me ipeshkvijtë, do të shkojë në Katedrale e, në
fund, në sheshin Karlo Feliçe, për takimin me të rinjtë.