365 ditë me njerëz e ngjarje që ia ndryshuan faqen botës: "Abati i Epesë shpik gjuhën
e shenjave".
(07.08.2008 RV)Paris, 1788. Një
vajzë e vockël ecën rrugës së bashku me të jatin. Papritmas ndalet, tejet e habitur.
Një grup fëmijësh mocatarë i kalon përpara. E pra këtu s’ka asgjë për t’u çuditur:
hundët i kanë të pastra e veshjet, pa asnjë njollë. Por, me sa duket, vëmendjen e
Marionit e tërheq sjellja e tyre. Duket sikur flasin, por nga goja nuk u del asnjë
tingull. Bëjnë shenja e duket sikur i drejtojnë njëri-tjetrit pyetje, të cilave pastaj
u përgjigjen po me shenja. E bisedimi duhet të jetë shumë i këndshëm, përderisa qeshin
në heshtje. E vetmja zhurmë që dëgjohet, është ajo e hapave. Marion nuk gabohet: këta
fëmijë bisedojnë gëzueshëm… pa thënë asnjë fjalë. Marion kthehet nga i jati e bëhet
gati ta pyesë, po babi e ka kuptuar ç’kërkon të thotë, pa e hapur ende gojën.
“Janë
shurdhmemecë. Këta fëmijë kanë lindur me veshët e shurdhër. E, me që nuk dëgjojnë,
nuk munden as të flasin. Për të komunikuar, flasin me gjuhën e shenjave, një gjuhë
që përdor gjestet në vend të fjalëve, a e kupton Marion? Bëjnë një shenjë me krah
ose me dorë, e kjo shenjë tregon një fjalë”.
“Baba, po kush ua mësoi këtë gjuhë?”.
“U
shpik pak kohë më pare: shpikësi i saj është ende gjallë. Njeriu i jashtëzakonshëm
është meshtar e quhet Abati i Epesë. Një ditë mendoi se nuk ishte mirë që shurdhmemecët
të liheshin në atë gjendje: me që askush nuk mund t’i kuptonte, e as të fliste me
ta, ishin braktisur në fatin e tyre, ishin përjashtuar nga familjet e nga shoqëria.
Konsideroheshin si të sëmurë a të mangët në tru e të gjithë i kishin frikë. Abati
i Epesë nisi të mendonte se një sjellje e tillë ishte e turpshme: shurdhmemecët janë
bij të Zotit, si të gjithë njerëzit. Si unë e si ti! Nuk kemi të drejtë t’i braktisim,
si të ishin egërsira”. “E pra, t’i shikosh, duken fare normalë!”. “Po, sigurisht,
Marion. Janë njerëz të zgjuar e të ndjeshëm, si gjithë të tjerët. Por ishin të detyruar
të jetonin mbyllur në heshtje, derisa abati i Epesë nuk i çliroi nga ky burg. Tani
është hapur një shkollë e posaçme për ta, ku mësojnë gjuhën e shenjave. Mësojnë të
flasin me njëri-tjetrin, madje edhe të shkruajnë e të komunikojnë me njerëzit si ne,
që nuk e njohim gjuhën e tyre. E kështu shurdhmemecët nuk jetojnë më të mbyllur në
burgun e heshtjes”.