Hiroshima përkujtoi 63 vjetorin e shpërthimit të bombës së parë atomike.
(06.08.2008 RV) Sot Hiroshima përkujtoi 63-vjetorin e tmerreve, pasojë e hedhjes
së bombës së parë atomike nga amerikanët. Ishte pikërisht data 6 gusht e vitit 1945,
kur shpërthimi i bombës shkaktoi, në pak sekonda, vdekjen e 100 mijë njerëzve. Ndërsa
tri ditë më pas, më 9 gusht të të njëjtit vit, një bombë tjetër atomike do të shpërthente
mbi Nagasaki, duke shkaktuar 35 mijë të vdekur, pa llogaritur pasojat e radioaktivitetit,
që vijojnë akoma.